Make your own free website on Tripod.com

Tiddukla Tadelsant Imedyazen

Isalan
Asebter n umager | Imagraden | Isalan | Imenzayen | Taftilt | Imawalen | Idlisen-nnegh | Leqdicat-nnegh | Imazighen | Lmed tamazight | English | Español | Français | Arabe | Anmager | Tabrat n Yimedyazen | Arum-agh-d | Imaslad'en | Tamesgida | Amezruy n Tiddukla

 

 

Anṣuf yes-wen γer usebter-nneγ (page) n yisalan. Da tzemrem ad d-tafem isalan idelsanen (culturels) ay d-nesrusuy deg udeg-nneγ qrib yal dduṛt s yiles amaziγ. Isalan-nneγ (ay d-nettawey seg yeγmisen ed yideggen niḍen n internet) nessers-iten-id da γef leḥsab n uzemz (date) ay deg d-ffγen. Sit γef "Kemmel", swadda-a akk-n ad d-tafeḍ ugar n yisalan.

 

 

 

Taluft n yiselmaden imguta n Tubiret

 

           Iselmaden n Tubiret

Iselmaden n tmaziγt bdan-d asunded* n laẓ (28 Tubeṛ 2007)

Iselmaden n tmaziγt n Tubiret : Ass wis sin n usunded* (29 Tubeṛ 2007)

Ass wis tlata n usunded* n laẓ n yiselmaden imguta** n tmaziγt (30 Tubeṛ 2007)

Iselmaden igan asunded* la tent-ttaγen deg tezmert-nsen (31 Tubeṛ 2007)


 

Afrag aγelnaw* n Guraya : d tiẓgi la ineggren

 

Tama n Guraya - Bgayet

 

*parc national

 

Seg La Dépêche de Kabylie, 27 Tubeṛ 2007 – Uṭṭun 1643

 

Tiẓgi n Guraya [deg Bgayet] tesεa azal meγγren s ccbaḥa n ugama-ines (nature), s yimukan-ines n umezruy (ttarix) ed lateṛ aqbur yellan deg-s, d acu kan, tiẓgi-a la tetteddu akk-n ad tenger γef ljal n tmes ed yiguda (décharges) n tursaḍ ay yerwin akk tudert yellan deg-s. Tiẓgi-a d yiwen seg yideggen (sites) iwatan akk-n ad d-ttasen γer-s yimerrayen (touristes) yettmerriḥen deg ugama. Afrag aγelnaw (parc national) n Guraya tḥudd-it tanaḍt (décret) tis 84-327 n 3 Nwembeṛ 1984, d acu kan, ass-a, afrag-a yettwaḥṛes seg yal tama.  (Kemmel ...)

 


 

Tadiwennit ed Mohand Oussalem Houari*

Iddawen n Guraya

 

*amagaẓ (conservateur) n tẓegwa n Bgayet

 

”2719,95 n yiqeṭṭaren n tẓegwa ay yerγan deg unebdu iεeddan”

 

Mass Mohand Oussalem Houari d imḍebber n sserbis n uḥuddu n tẓegwa deg tmahelt (direction) n Taggaẓt (Conservation) n tẓegwa n Bgayet, yerna yesεedday-d yiwet n tesgilt deg Ṛṛadyu n Ṣṣ̣umam, d tin ay deg d-yettawey awal γef uεeyyen ed ussaki n medden i lmend n uḥuddu n tẓegwa. I lmend n wass aγelnaw (journée nationale) n ttejṛa ay d-yellan deg wass n 25 Tubeṛ, nga-as tadiwennit ay deg d-yessawel γef tegnit ay deg llan tẓegwa n twilayt n Bgayet sdeffir n tmes iεeddan fell-asent deg wayyuren iεeddan. Mass Houari yessawel-aγ, ladγa, γef ttawilat ay d-iṣ̣aḥen tarbaεt-nsen akk-n ad ssexsin times-nni yefkan axeṣ̣ṣ̣ar i tẓegwa. (Kemmel ...)

 


 

Tinḍi* la tettmettat deg Tizi Wezzu

 

*artisanat

Ttbeq amazigh

 

Γas ma yella tama n Lemεatqa tettwassen s ufexxar-ines, Ayt Yanni s weẓref-ines (lfeṭṭa) u Ayt Hicem s tṛakniwin-ines (tiẓerbay), mazal llant tmiwa niḍen iẓewren deg kra n ṣ̣ṣ̣enεat tiqburin, maca ur d-ssawalen ara fell-asent aṭas deg ttawilat n uxebber, u gar ṣ̣ṣ̣enεat-a, tella temsisnit (vannerie).

 

Ibetṛunen d lεeṛc ay deg llant 20 n tuddar ḍefrent γer tγiwant (commune) n Tizi Wezzu yerna zgant-d akk γef webrid n twilayt wis 147, gar Tizi ed Lemεatqa. Taddart Ufella, Kmuda, Imezdaten, Tasift, Tiγilt n Ḥemza ed Ayt Σemṛan Tasadurt d kra seg tuddar-a n Ibetṛunen ay deg mazal llan yinḍen (artisans) iẓewren mliḥ deg temsisnit (vannerie), u llant kra n twaculin din, tteddrent kan s ṣ̣ṣ̣enεa-a taqburt. 

D acu kan, tamsisnit, am waṭas n ṣ̣ṣ̣enεat tiqburin niḍen, la tetteddu akk-n ad tenger mebla ccek, deg tama-a. (Kemmel ...)

 


 

Sebεa u ṛebεin n yiseggasen seg wamsi ay yemmut

 

24 Tubeṛ 2007

 

Amdan ittettu amezruy (ttarix), maca amezruy werjin ittettu amdan. Llan kra n yergazen, ala d amezruy ay asen-yettarran tajmilt i lebda. Deg wass n 23 Tubeṛ 1960, yeγli Mohamed Beloauche d ameγras (ccahid) deg Teẓrut n Yinezliwen, s leslaḥ deg ufus. Belaouche yella d agenses (lieutenant) n wasun (zone) wis 4 n Twilayt tis 3. Ilul-d deg wass n 13 Dujembeṛ 1920 deg taddart n Tfuγalt, deg Imkiren (Tizi Wezz). Asmi ay yesεa εecrin n yiseggasen, yekcem, am waṭas n yelmeẓyen n tallit-ines, γer Ukabar n Weγref Adzayri (PPA – Parti du Peuple Algérie), γas akk-n yekker-d deg yiwet seg twaculin timeṛkantiyin akk n taddart. Mohamed Belaouche yella d amzenzu (ttajer) u yelmed Leqran, dγa d ay-a ay t-yejjan ad yessen mliḥ taεṛabt.  (Kemmel ...)

 


 

*grève de la faim

 

23 Tubeṛ 2007

 

Azal n ṛebεin n yiselmaden imguta (contactuels) n tmaziγt ara yettgen timeskanin (timesbaniyin) seg wasmi ay d-yebda useggas-a n uγerbaz akk-n ad asen-fken imukan n leqdic ara idumen, maca ar ass-a werεad ay asen-yettunefk way-n ara ssutturen.

 

Iselmaden-a ulac dduṛ ay deg ur gin ara tiγimit n tmeskant (sit-in) neγ annejmeε sdat n Tmehla n Usselmed (Direction de l’Education) neγ sdat n tnarut (bureau) n lwali n twilayt n Tubiret, maca menγir iγmisen (ijeṛnanen) n tama-nsen ay d-yessawalen fell-asen tikkwal, ula d yiwen ur asen-d-yesli. (Kemmel ...)

 


 

Tiẓrigin* Tira ed timliliyin n yimura deg tnedlist** n Bgayet

 

*Editions

**Librairie

 

Brahim Tazaghart yesεa tanedlist (librairie) ed wexxam n teẓrigin (édition), yerna yeεzem, netta akk ed yimeddukal-is ad d-rren tudert tadelsant deg temdint n Bgayet, anda ay d-yexsi yedles taggara-a.

 

Tanedlist n Mahindad tettwassen deg temdint n Bgayet. Sya γer da tettawey-d kra n umeskar (auteur) akk-n ad yeg assenzi s heddu (vente-dédicace) i yedlisen-is. Yiwen seg wid iεeddan syenna, deg wussan-a ineggura, netta d Ali Yahia Abdenour, u yessenz din adlis-is La dignité humaine (Nnif n wemdan), ay d-yessuffeγ deg wexxam n teẓrigin (éditions) n Inas. Deg Remḍan iεeddan, bdant la d-ttilint temliliyin akk ed yimeskaren, u ay-a yejja imezdaγen n Bgayet ad qqlen cwiṭ, cwiṭ γer tγuri, γer umezgun (théâtre) akk ed ssinima, am wakk-n ay mlalen ed kra n yimeskaren, inuẓar (ifennanen) ed yemdanen niḍen ay d-yesnulfuyen amaynut deg yinurar yemgerraden (yemxallafen). (Kemmel ...)

 


 

Asmekti n 17 Tubeṛ 1961

 

16 Tubeṛ 2007

 

Amh'aq n tikli n 17 Tuber' 1961 - Taghbalut : http://rebellyon.info/article907.html

 

Ass n 17 Tubeṛ 1961 d acu ay asen-d-yesmektay i yelmeẓyen-nneγ ... neγ ula d imeqranen-nneγ ? D ass n temlilit taneggarut (finale) n teqbuct n ddunit n tkurt n uḍar ? Neγ d ass ay deg d-yella wemyuṭṭaf (accrochage) d ameqran gar yiserdasen n Fṛansa ed yemjuhad deg yidurar-nneγ ay seg d-tuli ”taγect n yergazen ilelliyen yeγγaren i uzarug (indépendance)”, akk-n nella ncennu zik ? 

 

Ldzayer timziregt (indépendante) teqqim acḥal ur tefki azal i wass n 17 Tubeṛ, alama ay yeqqel wass-nni yettban-d d abeṛṛani γef umezruy (ttarix) n Ldzayer. Dγa nettwali d lawan ad bdun wid yettekkan deg tedyanin n wass-nni akk ed wid yellan d inagan imir-n ad bdun ad ssawalen fell-as skud mazal cfan, akk-n ass-nni ur yettwattu ara neγ ur t-ttaddamen ara wid ara yebγun ad t-sqedcen deg nnfeε-nsen. Ass n 17 Tubeṛ yuklal ad as-yettunefk wemkan s wazal-is u ad yers gar tedyanin ur nettwattu ara deg umezruy-nneγ.

 

Ass-a uwḍen 46 n yiseggasen ay-a seg wasmi ay ffγen yiminigen idzayriyen deg yiḍ, deg yizenqan imeqranen n Paris, akk-n ad ddun, ad gen tameskant (tamesbanit) u ad d-sseknen belli ugin agdal-nni n tuffγa (couvre-feu) ay d-yettwaḥettmen fell-asen. Imsulta (ibulisen), tamḍift tazirazt (garde mobile) akk ed yiγallen n tkebbanit tagdudant n tγellist (CRS - compagnie républicaine de sécurité) mmγen-d akk γef Yidzayriyen yerna gan deg-sen tagezzart (massacre). Deg umezruy (ttarix) n Paris, qlil anda ay ttewten medden ay d-yeffγen ad ddun s lehna s tiwweḥcit am ta. Gar n 200 ed 300 n medden ay yemmuten, 3000 ttwajerḥen u 11500 ttwaṭṭfen deg yiwen yiḍ. Azekka-nni, 1000 n tlawin ed 500 n yigerdan ay yernan ttwaṭṭfen. (Kemmel ...)

 


 

Internet ed yigemmayen* niḍen

 

*agemmay : alphabet.

Asekkil acinwat

 

D iseggasen ay-a seg wasmi ara ssutturent waṭas n tmura lḥeqq-nsent deg usseqdec n tira-nsent deg tirawt n yismawen n yideggen (sites) n Internet, maca alama ay d aseggas-a ay yesteεṛef wudus (organisme) amarikani ay d-yelhan s way-a akk-n ad ttusqedcent tira niḍen deg tansiwin (lladrisat) n Internet, menγir agemmay (alphabet) alatini . Tura, ismawen n yideggen zemren ad ttwarun s lekmal-nsen s ḥdac n yigemmayen ed yinagrawen (systèmes) niḍen n tira am tira tihendiyin ed tira ticinwatin.  (Kemmel ...)

 

 
 
 
 
 

 

Meḥyaf mgal Yinselmen : Timlilit deg Landalus γef tislamufubit*

 

*Islamophobie

 

11 Tubeṛ 2007

Tamesgida n Qurtuba

 

Qurṭuba, tin umi qqaren Córdoba s tespenyulit, d tamdint n Ibn Rucd, Ibn Σarabi akk ed ufelsaf uday Maymuni (Maimonide). Tamdint-a d yiwet seg tεeqqacin tucbiḥin n Landalus, am Γernaṭa (Granada) akk ed Icbilya (Sevilla). Deg wussan-a iεeddan, yella-d deg-s usarag agraγlan (conférence internationale) meγγren γef ”Tagamit [intolérance] akk ed meḥyaf mgal Yinselmen”.

 

Qurṭuba, sγur umazun-nneγ uslig (envoyé spécial)

 

Wid yextaren tamdint n Qurṭuba, xtaren azamul meγγren deg umezruy ineslem. Tamdint-a tezga-d rrif n wasif n Guadalquivir yerna leqṣ̣er-ines anda ay d-ttilint temliliyin yezga-d sdat n wemkan ay yes tettwassen mliḥ temdint n Qurṭuba : la Mezquita neγ Tamesgida (ljameε) Ameqran n Qurṭuba, ay rran yigelliden ikaṭuliyen d takatidṛalt mbeεd ma εawden kecmen akal ay deg llan Yinselmen. Tamdint-a xelḍen deg-s akk yidelsan (cultures), ixxamen-is yella deg-sen waγan (style) abaṛuki (baroque), maca nezmer ad nwali deg-s daγen lateṛ n tγerma tumawit (omeyyade) deg yal tardast n yal lḥiḍ. Maca deg yigenni n Qurṭuba n wass-a la ittezzi ukubṭir, dγa d ay-a ara aγ-d-yesmektin belli ur aγ-mazal ara deg tallit n Ibn Rucd akk ed Ibn Zeydun, wanag deg tallit n ETA akk ed tenṭagin (attentats) ay γef d-ssawalen akk yisallen. Dγa γef way-a ay d-yella usarag-a (conférence) yesεan azal deg wussan-a ay deg Inselmen ssamasen-asen deg yal amkan, ttmuqulen-ten s yir tamuγli, ttwakeṛhen, ttwaḥeqren u ttwanfan γef ljal n kra n yiderwicen iḥesben iman-nsen ssnen yerna xeddmen lumuṛ s yisem n Lislam.  (Kemmel ...)

 

 

1 - 2 - 3 - 4 - 5

Tiddukla Tadelsant Imedyazen
Association culturelle Imedyazen
BP 129 Poste Didouche Mourad
16006- Alger - Algérie
Tel. (+213) (0) 64 77 07 37
 
Tararast taneggarut : 16 - 10 - 2007