Make your own free website on Tripod.com

Tiddukla Tadelsant Imedyazen

Asebter n umager | Imagraden | Isalan | Imenzayen | Taftilt | Imawalen | Idlisen-nnegh | Leqdicat-nnegh | Imazighen | Lmed tamazight | English | Español | Français | Arabe | Anmager | Tabrat n Yimedyazen | Arum-agh-d | Imaslad'en | Tamesgida | Amezruy n Tiddukla


 

Taluft n yiselmaden imguta n Tubiret (taggara)

                             Tifrat n taluft n yiselmaden n tmazight n Tubiret

Ass wis 9 n usunded* n laẓ n yiselmaden n tmaziγt : zemren ad reglen yiberdan (4 Nwembeṛ 2007)

 

Ass wis 10 n usunded* n laẓ n yiselmaden n tmaziγt  (5 Nwembeṛ 2007)

 

Iselmaden imguta* n tmaziγt ssawḍen γer lebγi-nsen (6 Nwembeṛ 2007)

 

Tisedmirin* sdeffir n ferru n taluft n yiselmaden n tmaziγt (7 Nwembeṛ 2007)

 


 

Ass wis 9 n usunded* n laẓ n yiselmaden n tmaziγt : zemren ad reglen yiberdan

 

*grève

 

”Menγir tifratin ay d-nessumer (proposer) yagi fell-asen, ulac tifrat niḍen”, d ay-a ay d-yenna uneγlaf (lewzir) n ttṛebga, Benbouzid, deg usarag ay iga iḍelli [3 Nwembeṛ] γef n yedlisen n uγerbaz, mi akk-n t-sseqsan γef wamek ara tefru temsalt n yiselmaden-nni n tmaziγt n Tubiret.

 

Iselmaden n Tubiret (deg 32 id-sen), γer-sen 9 wussan ay-a seg wasmi ay d-bdan asunded (grève) n laẓ sdat wexxam n tγamsa (presse) n Tahar Djaout, deg temdint n Ldzayer, akk-n ad ssuttren ad ten-rren γer yimukan-nsen n leqdic.

 

Benbouzid yettwassnen belli mi ara d-yini awal, ur itteqqel ara deg ṛṛay-is, yerna zzit i tmes u yenna-d belli iselmaden-a amur ameqran deg-sen sεan aswir n useggas wis tlata n tesnawit (lycée), dγa zemren kan ad ten-rren d imalalen (adjoints) n usselmed, d iqeddacen deg yinegmiyen (laboratoires), ma ulac, ma bγan ad qqlen γer usselmed n tmaziγt, yessefk ad gen assileγ (formation) deg yiles n Masensen, yerna ”aγlif (ministère) yewjed ad asen-yessifses anekcum γer wammas n ussileγ (centre de formation)”, γef wakk-n d-yenna Benbouzid.

 

Deg tgara, Benbouzid yextem-itt-id s wawal-a : ”ulac akk tifrat tasertit (politique) ay izemren ad tefru ugur n yiselmaden-a igan asunded (grève)”.

 

Ay-a maci d ay-n yesfeṛḥen iselmaden-nni, yerna, γef wakk-n ay aγ-d-nnan nitni, atni mazal-iten εewwlen akk-n ad kemmlen asunded-nsen (grève). ”Ur nberru ara i ḍḍbel deg waman, ad nkemmel alama d ḍḍerf”, ay aγ-d-nnan.

 

Tamsetla (solidarité) ed yiselmaden-a mazal la tettimγur. Yuγ lḥal, Farid Ferragui, acennay n tayri s teqbaylit, iṛuḥ iḍelli γer wexxam n tγamsa (presse) yerna yenna-d belli iselmaden-a ”ttalasen” s tidet ad ssuttren ad qqlen γer yimukan-nsen n leqdic. ”Tamaziγt, ass-a, teḥwaj iselmaden, yerna aql-aγ da akk-n ad nkemmel imenγi, nekni s yinuẓar (ifennanen)”, ay aγ-d-yenna Ferragui. Farid yesḥassef γef tegnit iweεṛen ay deg llan yiselmaden-a n tmaziγt, yerna iger-d tiγri i yiduba (autorités) akk-n ad εawden leḥsab-nsen u ”ad rren iselmaden-a γer yimukan-nsen γef zik lḥal”.

 

Ma d aneṭṭaq (porte-parole) n Tesmizwert n Tesnawiyin n Ldzayer (Coordination des Lycées d’Algérie – CLA), yessutter seg weγlif (ministère) ad d-yaf tifrat seg leεḍil, u ad yefru, deg tazwara-a, ugur iḥaren n tririt n yiselmaden-a γer yimukan-nsen, sakk-in ad d-yelhu ed temsalt n yigerdasen (diplômes), akk-n ad d-teqqar tanaḍt (décret) 168/05 n 7 Mayyu 2007. Γef leḥsab n Redouane Osmane, tanaḍt-a teqqar-d belli tifrat-a n seg leεḍil terza kan imeggiyen n tedbelt (agents de l’administration), gar-asen wid yeslemden tamaziγt deg yiγerbazen (llakulat).

 

CLA ay d-yeessuffγen iḍelli (3 Nwembeṛ) yiwen n welγu (communiqué), tger-d daγen tiγri i uselway n unabaḍ (ṛṛayes n lḥukuma), aneγlaf n ttṛebga ed yiduba (autorités) ay terza temsalt yerna zemren ad gen kra akk-n ad frun tamsalt-a s lḥir, u ad ifak lbaṭel ed tḥeqranit-a ”ara yettεeddin γef yimeddukal-nneγ iqeddcen deg usselmed n tmaziγt.

 

Gar yiselmaden igan asunded (grève), tella yiwet n tmeṭṭut s tadist, yerna tazmert-is la tneqqes seg wass ar ass, yerna CLA, deg welγu ay d-yessuffeγ, la d-yeqqar yif-it ma teḥbes tmeṭṭut-a asunded n laẓ.

 

Seg Dépêche de Kabylie, 4 Nwembeṛ, 2007

Sγur N. Belbachir

Tasuqilt sγur Omar Mouffok

 

 


 

Ass wis 10 n usunded* n laẓ n yiselmaden n tmaziγt

 

”Ssefhem-aγ-d ugar a Mass Benbouzid”

 

*grève

 

Sdeffir ma ssuttren aεiwen γer wakk wid terza temsalt war (bla) ma yettunefk-asen-d wacemma, iselmaden n Tubiret igan asunded (grève) n laẓ, yeqqim-asen-d kan yiwen n ussirem, ad as-ssuttren i uselway n tmurt ad d-iger iman-is akk-n ad yefru taluft-a iεeḍḍlen.

 

Dduṛt ay iεeddan yagi. Tamsalt n yiselmaden-a mazal werεad tefri, deg lweqt ay deg iduba (autorités) wten nneḥ, ur d-cligen ara. ”Asunded (grève) ad ikemmel war (bla) talast” ay aγ-d-nnan yiselmaden-nni ay yeqqimen deg tnedda (trottoirs) n Wexxam n Tγamsa (Maison de la Presse) n Tahar Djaout, deg temdint n Ldzayer.

 

Yuγ lḥal, awal ay d-yenna uneγlaf (lewzir) n tteṛbeyya sendiḍelli [3 Nwembeṛ] ur asen-yeεjib ara i yiselmaden igan asunded (grève) n laẓ. Γef way-a, tṛuḥ iḍelli [4 Nwembeṛ] yiwet n terbaεt seg yiselmaden-a γer wemni (parlement), maca ulac d acu ay d-uwyen. ”Ulac lexbar amaynut. Mazal-iten ṭṭfen kan deg tifratin-nni ay aγ-d-nnan uqbel”, ay aγ-d-tenna yiwet seg yiselmaden-nni, yettlen iman-is deg tferṣ̣adit akk-n ad tḥudd iman-is seg usemmiḍ. D ay-a ay yejjan tarbaεt-nni n yiselmaden ad teqqel alama d aγlif (ministère) n tteṛbeyya.

 

Imeddukal-nsen yeqqimen deg wemkan, ṭṭfen tilifunat-nsen n ljib deg ufus u la ttqaraεen d acu n lexbar ara asen-d-rren wid-nni iṛuḥen γer weγlif (ministère). Yuγ lḥal, iselmaden-a la ssutturen ladγa, ad asen-d-sfehmen ugar γef tifratin-nni ay γef d-yessawel uneγlaf (lewzir) n tteṛbeyya sendiḍelli.

 

”Ssefhem-aγ-d ugar a Mass Benbouzid” ay d-nnan yiselmaden-nni. ”Ta d tamsalt n uzekka-nneγ. Yessefk ad nẓer sani ara ntteddu” ay aγ-d-rnan. Yuγ lḥal, tazmert n yiselmaden-a la tneqqes seg wass ar ass.

 

Seg tama niḍen, tamsetla (solidarité) ed yiselmaden-a mazal la tettimγur, imi iḍelli [4 Nwembeṛ], Chawki Salhi, umaru amatu (secrétaire général) n Ukabar anemlay n yiqeddacen (Parti socialiste des travailleurs), yusa-d ad iẓer iselmaden-nni. Salhi yebded γer yidis n yiselmaden-a n tmaziγt, u yenna-d belli ”ttalasen” ad ssuttren lḥeqq-nsen, u yerna-d belli ass-a ”llan wid yebγan ad beddlen agatu imetti (contrat social) ed wassaγ n leqdic (relation de travail) deg ddunit”. 

 

Ma d wid yettekkan deg Tiddukla n yiselmaden n tmaziγt n Bgayet, nnan-d belli ”ad bedden γer yidis-nsen [iselmaden n tmaziγt n Tubiret] alama d ḍḍerf”,  u rnan-d ”aql-aγ la nettxemmim ad neg ass n tmeskant (protestation) akk-n kan ara neqqel γer usselmed, deg dduṛt d-itteddun”.

 

Deg tegnit iweεṛen am ta, ay izemren ad tkemmel, iselmaden ed tselmadin timguta (contractuels) n tmaziγt n Tubiret nnan-d belli tura ”tifrat attan gar yifassen n iduba izuyaz (pouvoirs publics)”. U rnan-d belli skud ur aγ-d-sfehmen ara ugar yerna ur aγ-d-gin ara ay-n la nessuttur, meḥsub skud ur aγ-rrin ara s imukan-nneγ n leqdic, asunded-nneγ (grève) ad ikemmel”.

 

Seg Dépêche de Kabylie, 5 Nwembeṛ, 2007

Sγur N.Belbachir

 

 


 

Iselmaden imguta* n tmaziγt ssawḍen γer lebγi-nsen

 

*contractuels

 

Iselmaden n tmaziγt igan asunded (grève) n laẓ yettunefk-asen-d way-n llan ssutturen. Iḍelli, γef 2:30 n tmeddit, deg Wexxam n Tγamsa (presse) n Tahar Djaout, nufa-n iselmaden-nni feṛḥen, yerna tiselmadin yettekkan deg usunded-nni llant la ssiγritent seg lfeṛḥ.

 

Γef wakk-n ay d-yenna uneγlaf (lewzir) n tteṛbeyya, iselmaden-a ”ad qqlen s imukan-nsen dindin”. ”Azekka [6 Nwembeṛ], ad teqqlem γer yimukan-nwen n leqdic”. Akk-a ay asen-d-yenna Mohamed Sgheir Kara, d amazan (député) n FLN deg wemni (parlement).

 

Kara yellan zik d aneγlaf (lewzir) n tmerrit (tourisme), iṛuḥ iḍelli tameddit γer wemkan anda ay llan yiselmaden-nni akk-n ad ten-iwanes deg leεtab ed terẓeg ay deg llan deg ḥdac n wussan-a iεeddan. ”Sdeffir ma mcawaṛen yiselmaden ed weγlif (ministère) acḥal d tikkelt, tura nessaweḍ γer tifrat-nni ay llan ssaramen-tt yiselmaden-a yesεan tiwaculin”, ay d-yenna Kara. U yerna-d belli ”iselmaden-a, deg 35 id-sen, ad qqlen γer leqdic-nsen seg uzekka d asawen, u ad qqlen ya d iselmaden n tmaziγt, ya d imalalen (adjoints) n usselmed”.

 

Kara, ay iqedcen d abdammas (intermédiaire) gar yiselmaden ed udabu, yessaweḍ-d iḍelli lexbar-a sdat n yiselmaden ed yineγmasen (imesjeṛnanen), u yenna-d belli ”seg Yunyu ay d-itteddun, iselmaden-a ad ten-rren d izewlanen (titulaires) u ad sεun imukan ara idumen deg Twuri tazayezt (Fonction publique)”. Ihi, γef wakk-n ay d-yenna Kara, ulac ccek belli aneγlaf ad d-yeg imukan n umeṣ̣ruf (postes budgétaires) imayuten seg wayyur n Yunyu ay d-itteddun. Yerna, Mass Kara yenna-d belli ”Akk-n kan ara d-yebdu useggas n uγerbaz amaynut, 35-nni n yiselmaden ad kecmen γer Usudu (Institut) n Ben Aknoun, anda ara γren tamaziγt tlata n yiseggasen”.

 

S way-a, nezmer ad d-nini belli adabu yesla-d i teγri n yiselmaden-a sdeffir ma sεeddan acḥal n wussan n wurfan, n lbaṭel, n laẓ ed usemmiḍ . Yuγ lḥal, asunded-nni (grève) n laẓ yesfeclen amur ameqran deg-sen yerna taselmadt-nni yellan s tadist yella yezmer ad as-yemmet memmi-s).

 

Yessefk ad d-nxebber belli ass-a, [ttlata, 6 Nwembeṛ], ad d-yili usarag n tγamsa (conférence de presse) ed yiselmaden-a deg Wexxam n Tγamsa n Ldzayer, akk-n ad d-ttunefken ugar n ttfaṣ̣il. Mazal ad d-neqqel γer temsalt-a.

 

Seg La Dépêche de Kabylie n 6 Nwembeṛ 2007

Sγur N. Belbachir

Tasuqilt sγur Omar Mouffok
 


 

Tisedmirin* sdeffir n ferru n taluft n yiselmaden n tmaziγt

 

*réactions

 

Sdeffir ma tefra s lxir taluft-nni n yiselmaden n tmaziγt igan asunded (grève) n laẓ, Tasmizwert (coordination) n tiddukliwin n yiselmaden n tmaziγt n twilayin n Bgayet ed Tizi Wezzu ed Tesmizwert n terkaf tiγermanin (Coordination des comités citoyens) n twilayt n Tubiret (CCCWB) ssuffγent-d iḍelli (ttlata 6 Nwembeṛ) yiwen n lkaγeḍ ay deg d-ssawlen γef lfeṛḥ-nsen imi ay yefra wugur-a.

 

Iselmaden igan asunded (grève) ula d nitni feṛḥen yerna xemmen ad gen asarag n tγamsa (conférence de presse) sdat neγ sdaxel n Wexxam n Tγamsa, maca ur ssawḍen ara yerna ur neẓri ara d acu ay d ssebba.

 

”Imenγi-nneγ yessaweḍ s ay-n nebγa” ay d-yenna uneṭṭaq (porte-parole) n yiselmaden-nni, Abdennour Djellaoui, yellan ed yimeddukal-ines. ”Tiririt n yiselmaden γer yimukan-nsen n usselmed n tmaziγt, asnulfu n yimukan n umeṣ̣ruf (postes budgétaires) imaynuten, iselmaden-a yessefk ad asen-ttunefken yimukan ara idumen u ad ttuceyyεen γer usudu (Institut) akk-n ad lemden amek ara sselmaden tamaziγt, d ay-a ay nella nessuttur-it, yerna tura nessaweḍ γer-s”, d ay-a ay aγ-d-tenna yiwet seg tselmadin yettekkan deg usunded-nni (grève).

 

Iselmaden n Tubiret snemmren (remercier) daγen akk wid ay ibedden γer yidis-nsen deg wussan-nni n yimenγi, ladγa inmula (syndicats) (CLA ed SNAPAP), Tamγunt (Ligue) n uḥuddi n yizerfan n wemdan, taγamsa (presse), Aseqqamu Unnig i Timmuzγa (HCA),  amussu aγerman (mouvement citoyen) ed ”temsetla (solidarités) n yimezdaγen n Umenzu n Mayyu (1er Mai)”, u rnan-d ”nebγa ad nesnemmer aγlif (ministère) n tteṛbeyya imi ay yettekka deg uṣ̣eggem n tegnit-nneγ seg yidis n uqeddic ed tudert, yerna la t-nettṛaju ad aγ-yeg ay-n akk-n ay yes ay aγ-yewεed”.

 

Ma d Tasmizwert (Coordination) n tiddukliwin n yiselmaden n tmaziγt n twilayin n Bgayet ed Tizi Wezzu thenna, deg yiwen n lkaγeḍ ay d-tessuffeγ, iselmaden n Tubiret γef ferru ay tefra taluft-nsen s lxir. Seg tama niḍen, wid yettekkan deg Tesmizwert-a ssarmen daγen deg yemḍebbren n weγlif (ministère) n tteṛbeyya ad ṭṭfen deg wawal-nsen tikkelt-a, ad rren iselmaden-nni γer yimukan-nsen n leqdic u ad ten-awyen ad gen assileγ (formation) deg tesdawit (université) ENS n Ben Aknoun. Seg tama-s, CCCWB, yenna-d belli yefṛeḥ imi ara qqlen yiselmaden-nni γer yimukan-nsen.

 

”Amussu aγerman (mouvement citoyen) yerra tajmilt i tebγest (lkuṛaj) n yiselmaden-nni igan asunded (grève) n laẓ, yerna amur ameqran deg-sen d tilawin, u ṣ̣ebren 10 wussan akk-n ad ssiwḍen γer way-n ssarmen. Amussu yerra daγen tajmilt i tmeṭṭut-nni yellan s tadist, u d tin ara yeqqimen d azamul n wezbu (résistance) i lmend n nnif, i lmend n leḥmala n leqdic ed leḥmala n tmaziγt”, ay nezmer ad nγer deg lkaγeḍ n CCCWB. Nnig way-a, Tasmizwert n CCCWB tenced inesmugal-ines deg twilayt n Tubiret akk-n ad ṛuḥen ass-a (7 Nwembeṛ), γef 10 n tṣ̣ebḥit γer Tkadimit ”akk-n ad ssiwlen γef temsalt-a ed unemhal (directeur) n tteṛbeyya n twilayt”.

 

Seg La Dépêche de Kabylie, 7 Nwembeṛ 2007, uṭṭun 1653

Sγur N. Belbachir

Tasuqilt sγur Omar Mouffok
 
 

 
 
 

Tiddukla Tadelsant Imedyazen
Association culturelle Imedyazen
BP 129 Poste Didouche Mourad
16006- Alger - Algérie
Tel. (+213) (0) 64 77 07 37