Tinḍi* la tettmettat deg Tizi Wezzu

 *artisanat

Γas ma yella tama n Lemεatqa tettwassen s ufexxar-ines, Ayt Yanni s weẓref-ines (lfeṭṭa) u Ayt Hicem s tṛakniwin-ines (tiẓerbay), mazal llant tmiwa niḍen iẓewren deg kra n ṣ̣ṣ̣enεat tiqburin, maca ur d-ssawalen ara fell-asent aṭas deg ttawilat n uxebber, u gar ṣ̣ṣ̣enεat-a, tella temsisnit (vannerie).

Ibetṛunen d lεeṛc ay deg llant 20 n tuddar ḍefrent γer tγiwant (commune) n Tizi Wezzu yerna zgant-d akk γef webrid n twilayt wis 147, gar Tizi ed Lemεatqa. Taddart Ufella, Kmuda, Imezdaten, Tasift, Tiγilt n Ḥemza ed Ayt Σemṛan Tasadurt d kra seg tuddar-a n Ibetṛunen ay deg mazal llan yinḍen (artisans) iẓewren mliḥ deg temsisnit (vannerie), u llant kra n twaculin din, tteddrent kan s ṣ̣ṣ̣enεa-a taqburt. 

D acu kan, tamsisnit, am waṭas n ṣ̣ṣ̣enεat tiqburin niḍen, la tetteddu akk-n ad tenger mebla ccek, deg tama-a.

Gar ssebbat ay yeswaγen tamsisnit (vannerie) nezmer ad d-nebder lexṣ̣aṣ̣ n tenga (matière) tamezwarut, ladγa imγan ay sseqdacen wid yettgen ṣ̣ṣ̣enεa-a akk-n ad d-ẓḍen iqecwalen ed ṭṭbuq. Tin yernan γer-s, imi tama-a tettwaεzel, tebεed γef yimukan anda ay ttilin medden, ṣ̣ṣ̣enεa-ines ur la d-tettban ara yerna ur la tettnuzu ara s waṭas. Deg tgara, yessefk daγen ad d-nger tamawt belli amur ameqran deg yinḍen ay mazal ttgen tamsisnit d imeqranen deg leεmeṛ yerna ilmeẓyen ur la lemmden ara fell-asen ṣ̣ṣ̣enεa-a.

Seg tama niḍen, yessefk ad d-nini belli ula d ṣ̣ṣ̣enεat niḍen ay d-nebder sufella-a am ufexxar, aẓref (lfeṭṭa) ed tṛakniwin la tteddunt akk-n ad negren imi iduba (autorités) ur d-cliεen ara seg yinḍen (artisans) ay tent-ixeddmen, u jjan-ten ad ḍebbren iqerray-nsen ed wuguren-nsen, am wakk-n, ṣ̣ṣ̣enεat-a qqlent sεant aεdaw d ameqran imi taggara-a, la tettnuzu aṭas n sselεa tamaynut u s wazal rxisen, dγa qqlen medden ur la as-ttafken ara akk azal i ṣ̣ṣ̣enεa taqburt n tmiwa-nsen.

I wakk-n ad asen-tettwaḍmen tudert i ṣ̣ṣ̣enεat-a, yessefk ad asen-neg ifadden i yinḍen (artisans) akk-n ad d-ssebdaden, γef umedya (lemtel) lluzinat ay deg d-xeddmen u ad snuzuyen sselεa-nsen. Daγen yessefk γef udabu ad yekkes lḥeṛs yellan γef yinḍen ama seg yidis n lekwaγeḍ, ama seg win n tiwsi (impôt), ad d-yessileγ (former) ilmeẓyen. Am wakk-n yessefk daγen ad yettwaxdem leqdic n tesnulzuzt (marketing) i wakk-n ad tettnuzu mliḥ sselεa.

D acu kan, yessefk ad tili tsertit (politique) n tidet ara yefken azal i tinḍi (artisanat) ladγa imi ṣ̣ṣ̣enεat-a tiqburin xellqent-d ama d idrimen, ama d imukan n leqdic yerna tinḍi teγimi-d d tanagit n tidet γef tγerma-nneγ (civilisation) ed yedles-nneγ aqbur.

Seg Dépêche de Kabylie, lexmis 25 Tubeṛ, 207, uṭṭun 1642