Make your own free website on Tripod.com

Tiddukla Tadelsant Imedyazen

Asebter n umager | Imagraden | Isalan | Imenzayen | Taftilt | Imawalen | Idlisen-nnegh | Leqdicat-nnegh | Imazighen | Lmed tamazight | English | Español | Français | Arabe | Anmager | Tabrat n Yimedyazen | Arum-agh-d | Imaslad'en | Tamesgida | Amezruy n Tiddukla

 

Meḥyaf mgal Yinselmen : Timlilit deg Landalus γef tislamufubit*

 

*Islamophobie

 

11 Tubeṛ 2007 

Tamesgida n Qurtuba

 

Qurṭuba, tin umi qqaren Córdoba s tespenyulit, d tamdint n Ibn Rucd, Ibn Σarabi akk ed ufelsaf uday Maymuni (Maimonide). Tamdint-a d yiwet seg tεeqqacin tucbiḥin n Landalus, am Γernaṭa (Granada) akk ed Icbilya (Sevilla). Deg wussan-a iεeddan, yella-d deg-s usarag agraγlan (conférence internationale) meγγren γef ”Tagamit [intolérance] akk ed meḥyaf mgal Yinselmen”.

 

Qurṭuba, sγur umazun-nneγ uslig (envoyé spécial)

 

Wid yextaren tamdint n Qurṭuba, xtaren azamul meγγren deg umezruy ineslem. Tamdint-a tezga-d rrif n wasif n Guadalquivir yerna leqṣ̣er-ines anda ay d-ttilint temliliyin yezga-d sdat n wemkan ay yes tettwassen mliḥ temdint n Qurṭuba : la Mezquita neγ Tamesgida (ljameε) Ameqran n Qurṭuba, ay rran yigelliden ikaṭuliyen d takatidṛalt mbeεd ma εawden kecmen akal ay deg llan Yinselmen. Tamdint-a xelḍen deg-s akk yidelsan (cultures), ixxamen-is yella deg-sen waγan (style) abaṛuki (baroque), maca nezmer ad nwali deg-s daγen lateṛ n tγerma tumawit (omeyyade) deg yal tardast n yal lḥiḍ. Maca deg yigenni n Qurṭuba n wass-a la ittezzi ukubṭir, dγa d ay-a ara aγ-d-yesmektin belli ur aγ-mazal ara deg tallit n Ibn Rucd akk ed Ibn Zeydun, wanag deg tallit n ETA akk ed tenṭagin (attentats) ay γef d-ssawalen akk yisallen. Dγa γef way-a ay d-yella usarag-a (conférence) yesεan azal deg wussan-a ay deg Inselmen ssamasen-asen deg yal amkan, ttmuqulen-ten s yir tamuγli, ttwakeṛhen, ttwaḥeqren u ttwanfan γef ljal n kra n yiderwicen iḥesben iman-nsen ssnen yerna xeddmen lumuṛ s yisem n Lislam.

 

D Tuddsa i Tγellist d Wemyalel deg Tuṛuft (Organisation pour la sécurité et la coopération en Europe – OSCE) ay d-iḍebbren akk-n ad d-yili usarag-a (conférence), yerna ad ttekkin deg-s 300 n yemdanen, usan-d seg 56 n tmura, seg xemsa n yimenẓawen (continents). D Miguel Moratinos, aneγlaf (lewzir) aspenyuli n tγawsiwin n beṛṛa ara yesseddun lecγal n usarag-a. Yessefk ad d-nesmekti daγen belli d netta ay d aselway n Tuddsa i Tγellist n Wemyalel deg Tuṛuft. Asarag n Qurṭuba ad d-asen γer-s kra n medden ay yettwassnen am Amr Moussa, amaru amatu (secrétaire général) n Temγunt Taεṛabt (Ligue arabe) akk ed uselway apuṛtugali aqbur Jorge Sampaio, yellan d agensas (représentant) aεlayan n Temsisa n Tγermiwin (Alliance des civiisations) (d tarbaεt ay d-yesnulfa Zapatero u ddmen-tt Lejnas Yeddukklen). Yessefk daγen ad d-nger tamawt belli ad yettekki deg usarag-a yiwen n wefrilat (prélat) ay d-yettuceyyεen seg Vatican akk ed yiwen n ugensas (représentant) n Tuddsa n Usarag Ineslem (Organisation de la Conférence Islamique). Axxam Aεṛab (yellan deg Spenyul) yettekka deg tigin n usarag-a (conférence) ay deg ara teḥdeṛ tselwayt-is, Gema Martin Munoz. Yuγ lḥal, Axxam Aεṛab d tasudut tazayezt (institution publique) iqeddcen i lmend n usselhu n wassaγen (relations) gar Spenyul ed tmura tiεṛabin.

 

”Deg 2005, tamdint n Qurṭuba yella-d deg-s yiwen n usarag (conférence) agraγlan γef temgelsamit (antisémitisme). Ass-a, nelha-d ed tgamit (intolérance) akk ed meḥyaf mgal Yinselmen”, ay d-yenna uneγlaf aspenyuli n tγawsiwin n beṛṛa i lmend n tullya n usarag-a. ”Qurṭuba tella d azamul (symbole) n ccbaḥa n Landalus u d amedya (lemtel) ay d-yesskanayen amek llan ddren Yinselmen, Udayen ed Yimasiḥiyen deg yiwen wemkan mebla ccwal”, u yerna-d belli : ”Tamsirit (racisme) akk ed meḥyaf la ttnernin ass-a (...) Seg 2001 ar ass-a, aṛabul (rapport) n Usanay uṛufi mgal temsirit d kaṛuh n lbeṛṛani yesskanay-d belli kaṛuh mgal Yinselmen la yettnerni yerna ay-a yessagad”. Seg tama-ines, amaru amatu (secrétaire général) n Temγunt Taεṛabt (Ligue Arabe), yesteṛḥeb s usarag-a ”yesεan azal meγγren” u iger-d tamawt belli tislamufubit (kaṛuh n Yinselmen) ur d-tban ara asmi ay ḍrant tedyanin n 11 Ctembeṛ 2001, wanag tella uqbel. Mass Moussa yesteṛḥeb daγen s takti-a (lfekra) n Temsisa n Tγermiwin (Alliance des Civilisations) ay d-yesnulfa unabaḍ (lḥukuma) aspenyuli akk-n kan d-llant tedyanin n 11 Meγres [deg Madrid], u gan ay-a akk-n ur ttmuqqulen ara medden Inselmen s yir tamuγli u ad tt-awyen deg-sen akk d ”ikamikazen” yessnen kan ad sṭerḍqen iman-nsen.

 

Yir tamuγli n Yinselmen

 

Asarag-a (conférence) yebḍa γef xemsa temsal timeqranin : ”Yir tamuγli d taqdimt ma d wid yenḍerren seg-s d ijdiden”, ”Ay-n n diri ay yes ara d-yeglu meḥyaf”, ”Ttawilat n uxebber ed yinaw azayez (discours public) γef Lislam ed Yinselmen”, ”Amek ay yezmer usselmed ad iḥaṛeb tagamit (intolérance)”, akk ed ”Leqdicat ijdiden i lmend n uḥaṛeb n meḥyaf mgal Yinselmen”. Wid yettekkan deg usarag qeddcen deg yinurar yemgerraden (yemxallafen) : llan yimenṣ̣aben (officiels), imazzayen (experts), imeγnasen (militants) n yizerfan n wemdan, iwamniyen (parlementaires) yettekkan deg Tuddsa i Tγellist d Wemyalel deg Tuṛuft (OSCE), irgazen n ddin ed yigensasen (représentats) n wakk leṣ̣naf n tuddsiwin tirnabaḍin (organisations non-gouvernementales). Tettunefk-asen akk nnuba akk-n ad d-ssiwlen u ad d-inin belli ur qbilen ara acemmet n Lislam ed Yinselmen deg ddunit. Ma d imaslaḍen (membres) n tfagliwin (délégations) ay d-yusan seg 56 n tmura ay yettekkan, ssawlen-d ladγa γef way-n ay gan akk-n ad ḥebsen tislamufubit (kaṛuh n Yinselmen). Gar wigi, nezmer ad d-nebder tagensast (représentante) n Kanada ay d-yessawlen γef yiwen n umazrar (série) n tilibizyu isem-is ”Ineslem amecṭuḥ deg welma” (Le petit musulman dans la prairie), u tenna-d belli wa d amazrar ay d-yettwagan akk-n ad mḥun yes-s kra seg tekta (lfekrat) n diri ay sεan medden γef Yinselmen.

 

”Ass-a, leqdicat n tislamufubit ttbanen-d s tummγa γef lejwameε, s truẓi n yiẓekwan n Yinselmen, s tummγa γef Yinselmen deg webrid, yerna llant tlawin tinselmin ay γef ttemmγen deg wezniq akk-n ad asent-kksen imendyal-nsent” γef wakk-n d-yenna Yusuf Fernandez, aneṭṭaq s yisem n Junta Islamica yellan d tiddukla tameqrant n Yinselmen deg Spenyul. Yusuf Fernanzez, am waṭas seg wid ay d-yessawlen deg usarag-a, ur ikukra ara ad iqaren tislamufubit γer temgelsamit (antisémitisme) u yenna-d belli kaṛuh-a, mbeεd ma iεedda γef Wudayen, tura ”yeqqel yelha-d s Lislam”. ”Mbeεd ma llan kkaten-d deg Udayen belli d imecḥaḥen, qqlen tura la as-ssamasen i Yineslem belli d ameḍḍarfu (extrémiste). Zik llan ssawalen-d γef Yineggafen n Yimussnawen n Ṣehyun (Protocoles des sages de Sion) akk-n ad asen-ssimsen i Wudayen u ad d-inin belli msefhamen yes-s akk-n ad ḥekmen ddunit. Ass-a, la d-ssawalen γef tdukli gar yikabaren (partis) n uzelmaḍ ed yinselmen imaẓaren (radicaux) ay yemsefhamen akk-n ad as-gezmen i Tuṛuft iẓuran-is imasiḥiyen”.

 

Agensas (représentant) n yiwet n tiddukla talmanit yessawel-d γef liḥalat niḍen n meḥyaf am wemnaε ara ttwamnaεent tselmadin akk-n ad lsent lḥijab, neγ daγen amnaε ay ttwamenεent teqcicin yetturaren takurt n uḍar d tkurt n ufus akk-n ad tturarent s lḥijab. Seg tama-ines, Khaled Fouad Allam, yellan d amazan (député) deg temdint n Trieste (deg Ṭ̣ṭalyan) u d amsenmetti (sociologue), yessawel-d γef wugur n lqella n wid ara d-igenssen (représenter) inselmen deg yemniyen (parlements) n Tuṛuft. ”Nekni nella deg tmetti maca ulac-aγ deg tsertit (politique)” ay d-yenna. ”Deg Ṭ̣ṭalyan, llan sin kan n Yinselmen deg wemni”. Amazan aswidi Goran Lenmarker, yellan d aselway n wegraw awamni (assemblée parlementaire) n Tuddsa i Tγellist d Wemyalel deg Tuṛuft (OSCE) yerna-d deg wawal n Allam, u yenna-d daγen belli lqella n uxeddim γer Yinselmen n Tuṛuft d yiwet seg tγawsiwin ay d-yesskanayen meḥyaf yellan din, u iger-d tamawt belli iminigen yeddren deg tmura-a la ten-ttmuqqulen amazun d ”imakaren n uxeddim”. Lenmarker yessawel-d daγen γef wuguren ay d-ttemlilin Yinselmen akk-n ad bnun timesgidiwin (lejwameε) deg Tuṛuft u yenna-d belli ”Ineslem yettalas ad iṛuḥ ad yeẓẓal deg wass n ljemεa u aqerruy-is d aεlayan”.

 

Asarag-a yeldi tawwurt akk-n ad d-ssiwlen γef wakk ay-n ara d-yesskanayen aḍḍan-a amaynut n wekṛah n yibeṛṛaniyen, win umi semman ”tislamufubit”. Yella daγen wugur n tisin n waṭas n yiminigen ijdiden γer Tuṛuft, taggara-a, wi d ”Inselmen ijdiden” neγ d lḥeṛṛaga (iminigen irsuḍaf – émigrés illégaux) ay d-ttḍeyyirent lemwaj γef yiri n lebḥeṛ n tγerma (civilisation) taγerbit. Imanayen (observateurs) la d-qqaren belli ula d wigi la ten-ttmuqqulen Wuṛufiyen s tugdi, imi ur xeddmen deg-sen laman.

 

Tuddsiwin tirnabaḍin (organisations non-gourvernementales) ed tid n yizerfan n wemdan bedrent-d seg tama-nsent leṣ̣naf niḍen n meḥyaf yeffren am tḥeqranit n Yinselmen deg tukci n tnezduγin, deg udawi ed westenfeε seg kra n yimeẓla izuyaz (services publics) s umata, yerna ula d iminigen ijdiden umi ttunefken lekwaγeḍ n tmura ay deg llan ur mniεen ara seg tḥeqranit-a.

 

Maca tiγawsiwin ay d-yesskanayen tislamufubit (akṛah n Yinselmen) s tidet, taεinanit kan, akk-n d-yenna Khizar Ansari n tesdawit n London, netta d tifγulin-nni (caricatures) ay d-gan γef Nnbi ed ”tuccḍa” ay iga upapas Benedictus wis XVI (tamsalt n lxeḍba-nni ay d-iga deg Ratisbonne). Daγen, tamsalt n ma yella Tteṛk ”tettekka deg Tuṛuft” ed ”yikayaden (tests) n ADN” mazal werεad ur ten-fhimen ara Yinselmen yerna d timsal ay ten-yesserfan. Tigi akk yessefk ad asent-d-nernu ashetref-nni n George Bush ay d-yessawlen γef ”tislamufacit” [meḥsub iquren Lislam γer tfacit].

 

Tuzzma γef ttawilat n uxebber :

 

Seg wasmi ay εeddant tedyanin n 11 Ctembeṛ 2001, tennerna tmuγli n diri ed tekta (lfekrat ) n diri γef Yinselmen, yerna, deg sin wussan-nni ay yeṭṭef usarag-a, wid yettekkan deg-s zzmen-d akk-n yessefk γef ttawilat n uxebber. Amnadi Thomas Deltombe yessawel-d γef ttawilat n uxebber ifṛensisen u yenna-d belli ttawilat-a ttwalin belli ass-a llan sin n yixeṣ̣ṣ̣aren ay yessefk ad ten-nagad : seg tama, yella Lislam ”ajihadi”, ma seg tama niḍen, yella uyeffus ameḍḍarfu (extrême droite), yerna Deltombe yenna-d belli ayeffus-a ameḍḍarfu ”yufa iman-is ass-a, mi akk-a ay ugaden medden seg Lislam”.

 

Ttawilat n uxebber ssawalen-d kan akk-n ad asen-ssimsen i Yinselmen, ma ulac, ttajjan-ten deg yidis, ur d-ssawalen fell-asen, nnig way-a, Inselmen ittegget kan fell-asen wawal asmi ara ḍrun yixeṣ̣ṣ̣aren isertiyen am tedyanin n 11 Ctembeṛ, amgaru (ṭṭrad) n Lεiraq, taluft n Ccerq Alemmas neγ lintifaḍa n yiγaramen (cité) n Fṛansa, yerna ttawyen-tt-id amzun tecγeb-iten temsalt n Yinselmen yili netta d lekdeb. Hisham A. Hellyer yellan d amaslaḍ (membre) n yiwet n terbaεt n unadi i lmend n unabaḍ (lḥukuma) abriṭani ay d-sbedden deg wussan-nni ay deg ḍrant tedyanin n 7 Yunyuz 2005 deg London, yesḥassef imi ttawilat n uxebber la ttmuqqulen Inselmen s yiwet n tmuγli ixuṣ̣ṣ̣en, sufella kan u s tḥeqranit yerna, deg yeskasiyen (débats) n ttawilat-a n uxebber,  ttekkayen kan yimezzayen (experts) n tkellax ”ur ssinen ara ula d taεṛabt yerna ur ssinen acemma γef umezruy (ttarix) n umaḍal (monde) ineslem”, dγa d wi ay d-ttawyen akk-n ad d-ssiwlen γef temsal la iḍerrun tura, deg lweqt ay deg imassanen isdawanen (universitaires) ttarran-ten deg yidis, ur d-ttwabdaren ara akk.

Asarag n Qurtuba ghef tislamufubit

 

Dduṛ-a icemten ay tturaren ttawilat n uxebber deg ussimes n Lislam ssawlen-d daγen fell-as sin-nni n yigensasen (représentants) idzayriyen yettekkan deg usarag-a. Wi d Mustapha Cherif ed uselway n Useqqamu Ineslem Aεlayan, aduktur Bouamrane. Asarag n Bouamrane d win umi isemma ”Ayγer yessefk ad nḥaṛeb tislamufubit ?” u iwet-d deg-s deg ”ucemmet ara yettucemmat Lislam deg umur ameqran seg way-n d-yettwarun neγ d-yettwannayen [deg ttawilat n uxebber]”. Menγir taγamsa (presse), Bouamrane yebder-d daγen idlisen ”yettuwehhan” γer wekṛah n Lislam, u gar-asen yella wungal Plateforme ay d-yura Michel Houellebecq. Bouamrane yenna-d, i lmend n weḥbas n tislamufubit, yessefk ad yettwaxdem leqdic ay yes ara neεreḍ ”ad nqenneε” medden ad beddlen axemmem-nsen, am wakk-n ad d-yessawel γef leqdicat ”ara iḥettmen kra ad d-qqlen s abrid”, gar-asent yella ula d aεaqeb n ttawilat n uxebber ay yettcemmiten Lislam s yisem n tlelli n wawal.

 

Wid yettekkan deg usarag-a (conférence) ssawlen-d daγen aṭas γef usselmed u ḥetten belli yessefk ad asen-slemden i yigerdan ad qeblen u ad ttqadaren wiyaḍ seg wasmi ara ilin deg ”uγerbaz n uheyyi (maternelle)”. Dγa, γef temsalt-a, Riay Tatary yettekkan deg Tesmilt (commission) taspenyulit tineslemt yenna-d ”yessefk ad nεawed tamuγli i yedlisen-nneγ n uγerbaz imi idlisen-a sseddayen tikta (lfekrat) n diri γef Lislam”. Γef leḥsab-is, igerdan yessefk ad γren ledyan niḍen deg uγerbaz (llakul) yerna d wa ay d abrid igerrzen akk akk-n ad nesselmd i yigerdan ad qebblen u ad ttqadaren wiyaḍ.

D acu kan, wid yettekkan rran-d daγen lwelha-nsen γer dduṛ ay tetturar twacult ed ttṛebga deg way-a.

 

Seg tama niḍen, wid yettekkan ḥetten-d γef ussileγ (formation) n limamat akk-n ad zemren Yinselmen ad slemden ddin-nsen akk-n igerrez, yerna imeḍḍurfa (extrémistes) ur ttafen ara abrid akk-n ad zerεen tikta-nsen (lfekrat), ladγa s internet.

 

Seg El Watan, 11 Tubeṛ 2007

Sγur Mustapha Benfodil

Tasuqilt sγur Omar Mouffok

 

 
 
 

Tiddukla Tadelsant Imedyazen
Association culturelle Imedyazen
BP 129 Poste Didouche Mourad
16006- Alger - Algérie
Tel. (+213) (0) 64 77 07 37