Make your own free website on Tripod.com

Tiddukla Tadelsant Imedyazen

Asebter n umager | Imagraden | Isalan | Imenzayen | Taftilt | Imawalen | Idlisen-nnegh | Leqdicat-nnegh | Imazighen | Lmed tamazight | English | Español | Français | Arabe | Anmager | Tabrat n Yimedyazen | Arum-agh-d | Imaslad'en | Tamesgida | Amezruy n Tiddukla


 
 
*bibliothèque
 
Deg wass n 20 Yebrir ay tettwaldi temkarḍit n Tkanna, i lmend n wesfugel (célébration) n Tefsut n Yimaziγen. Taddart-a tuzga-d deg tγiwant n Wayt Yeḥya ay γef tebεed s 5 n yikilumitren. Aseggas-a, tameγra n Tefsut n Yimaziγen deg Wayt Yeḥya ur d-telli am leεwayed. D acu kan, tiddukla ”Tafrara” tga akk ay-n umi tezmer akk-n ad tesfugel ass n 20 Yebrir akk-n iwata.
 
Deg taddart-a, anda ulac amkan anda ara zhun yelmeẓyen neγ ad kken lweqt-nsen, alday n temkarḍit-a (bibliothèque) d ay-n llan ssaramen-t seg zik. Arezki Aït Salah, aselway n tiddukla, yenna-aγ-d dakk-n d imezdaγen n taddart ay igan tacemlit, sgerwen-d idrimen, uγen-d tiγawsiwin n lebni u ssulin tamkarḍit-a. Llan qeddcen ula deg wussan n westeεfu, deg tgara n dduṛt. Ass-a, leqdic-nsen nettwali-t : tamkarḍit tuzga-d s ddaw n tmesgida (ljameε) n taddart, yernu yecbeḥ mi ara tent-nwali akk-n d tijiratin.  (Kemmel ...)
 

 
 
(17/04/2007)

Kra kan n wussan uqbel n wesmekti wis 27 n Tefsut n Yimaziγen d wesmekti wis 7 n Tefsut taberkant (ussan n 20 d 21 Yebrir), tiddukliwin tidelsanin deg Bgayet la qeddcent akk-n ad d-heyyint ahilen (programmes) yemxallafen akk-n ad asen-rren tajmilt i yergazen n yedles d wid yefkan tudert-nsen d asfel i lmend n tefsut-agi n lqerḥ. Leqdic yegget (yeṭṭuqqet) deg wakk timiwa n twilayt n Bgayet. (Kemmel ...)


 
 
(15/04/2007)
Aghdem n Ccix Aheddad
 
 
 
Gar wussan n 5 d 8 Yebrir 2007, imezdaγen n Sedduq, Tamurt n Leqbayel d Ldzayer s lekmal-is smektan-d Ccix Aḥeddad, yiwen seg yergazen yennuγen Ifṛensisen akk d lbaṭel-nsen aberkan ay sεeddan γef wegdud-nneγ.
 
 
Deg wussan-nni n wesmekti, taγiwant (commune) n Sedduq akk d tiddukliwin gant timzikkniyin (expositions) d yemzazwaren (concours). Nnig way-a, aseggas-a ara ifak ahat lemqam-nni ay as-bnan i Ccix Aḥeddad, d amkan wuγur ara d-awin iγsan-is akk-n ad yettwamḍel deg wakal n taddart-is.  
 
Lemqam-a yuzga-d deg wemkan umi qqaren Amdun n Sedduq, d amkan anda ay d-yessegrew (yesnejmeε-d) Ccix Aḥeddad imezdaγen n tama-nni akk-n ad asen-yini ad bdun imenγi d Yefṛensisen. (Kemmel ...)
 

Asselmed n tmaziγt deg Tizi Wezzu : 250 n yimunan* deg wenrar

(09/04/2007)
 
tifinagh.jpgTnac n yiseggasen seg wasmi ay tekcem γer uγerbaz (llakul), tamaziγt mazal ur tufi ara iman-is ar ass-a. Γas ma yella aγlif (ministère) n usselmed yefka idrimen akk-n ad d-heyyin imukan n leqdic i wid ara tt-yeslemden deg yal tama, tamaziγt werεad ur tekcim akk iγerbazen. 
 
D acu kan , aseggas-a yella ussirem akk-n ad beddlent lumuṛ. Deg umekraḍ (trimestre) wis tlata n useggas-a, 250 n yinelmaden ara d-yettheyyin ajdel-nsen (thèse) deg usselmed n tmaziγt yernu atni tura d imanunen (stagiaires), la ttṛuḥun γer yiγerbazen anda ay ttselmaden tamaziγt akk-n ad ssnen ula d nitni amek ara slemden iles n Masensen. Deg uγerbaz alemmas n Waytmaten Harchaoui, deg Dreε Lmizan [Tizi Wezzu] nemlal-d ṛebεa n tmanunin. (Kemmel ...)
 

 
 
 
*nouvelles
 
Laṛebεa 11 Yebrir 2007
 
Timsizwert tis setta n tlawin yettarun tullisin (nouvelles) deg tmura n Wegrakal (Méditerranée) d tin yebdan seg wayyur n Fuṛaṛ iεeddan u mazal ad tkemmel alama d taggara n Mayyu. Timsizwert-a zemrent ad ttekkint deg-s akk tilawin tidzayriyin n wakk iswiren (niveaux) n leqraya d wakk leεmaṛ Zemrent ad ttekkint s tullist ur nettεeddi ara i 10 n yisebtar (pages), tura s taεṛabt, s tefṛensist neγ s tmaziγt, d acu kan, yessefk γef myall-is ur tettili ara tessuffeγ-d yagi kra n tullist neγ kra n wungal deg wedlis.
 
Timsizwert-a tga-tt-id tiddukla n « Femmes en communication » (Tilawin deg teγwalt) s wemεiwen akk d Forum des Femmes (Anmager n Tlawin). Asentel (thème) n temzizwert n useggas-a netta d « asfur » (masque). Wid igan timsizwert-a bγan ad gen ifadden i tmeṭṭut akk-n « ad taru, ad d-tessiwel γef yiγeblan-ines u ad d-tessuffeγ akk ay-n teffer ». D ay-a ay d-tenna tselwayt n tiddukla, Massa Nafissa Lahreche i APS. (Kemmel ...)
 
 
 
*célébrer
 
23 Yebrir 2007
 
Mkira (Tizi Wezzu) – Aseggas-a, deg Mkira, d tiddukla tadelsant Tad’art, n taddart n Imεanden ay igan tameγra n Tefsut n Yimaziγen, deg lweqt ay deg ilindi, d tiddukla Aider n taddart n Taṛemmant ay d-yelhan id-s.
 
Γas ma yella tlata kan n yiseggasen ay-a seg wasmi ay d-tettussebded, tiddukla Tad’art tga tameγra-a akk-n iwata. Ahil (programme) ay d-theyya tiddukla-a d win yeṭṭfen dduṛt s lekmal-is, d ay-a ay yejjan akk ilmeẓyen d yigerdan n taddart ad ttekkin deg leqdicat n yedles d waddal (sport) deg temsizizlin-nni (concours) akk ay yettwagan. (Kemmel ...)
 

 
Asaru amaziγ amaynut : Ddiγ d yir arfiq n Mokrane Hemmar
D assikel* deg wul d ccbaḥa n Tmurt n Leqbayel

(09/04/2007)
 
Deg wussan n uxebber n wesliẓri (audiovisuel) ay d-yellan deg wexxam n yelmeẓyen n Yiwaḍiyen (Tizi Wezzu), sseknen-d asaru (film) n Mokrane Hemmar, Ddiγ d yir arfiq, u yella-d fell-as weskasi (débat). D wa ay d asaru amezwaru ara d-yeg Mokrane Hemmar yernu yuklal ten-henni γef leqdic-ines igerrzen. Imsuffeγ (réalisateur) n usaru-a yesseqdec tugna (image) ugar n wawal akk-n ad aγ-d-yessken ccbaḥa n Tmurt n Leqbayel. Ma d taḥkayt n usaru-a d tin n sin yelmeẓyen iqbayliyen, Meziane d Kaci, iṛuḥen akk-n ad d-nadin axeddim dγa ad d-mlilen d waṭas n wuguren deg webrod-nsen. « D nekni ay d-ixuylen taḥkayt-a. Yernu aklas (tournage) n usaru-a yeṭṭef-aγ aseggas, u yeffeγ-d d asaru awezlan (court-métrage) n 51 n ddqayeq. Asaru-a nga-t-id deg yidurar n Jeṛjeṛ, gar Ayt Buwaddu d Wegni Ggeγran (Tizi Wezzu). La nettsefray ad d-nerr tudert u ad as-nefk ljehd i leqdic n yisura s yiles amaziγ ». Ma deg way-n yerzan idrimen, imsuffeγ yenna-aγ-d dakk-n Aseqqamu Unnig i Timmuzγa akk d tiddukliwin Amezgun n Jeṛjeṛ d Amusnaw ttekkan-d akk akk-n ad d-gen asaru-a.
 
Sγur  A. Z.
La Dépêche de Kabylie, 9 Yebrir 2007 (uṭṭun 1474)
 

Asselmed n tmaziγt deg Ldzayer : assebded n tseqquma ara yefrun uguren
 

(07/04/2007)
 
Deg wass n Larebεa iεeddan (4 Yebrir 2007), tella-d yiwet n temlilit gar weγlif (ministère) n usselmed, Aseqqamu Unnig i Timmuzγa (HCA) d yiselmaden n tmaziγt deg tenγimt (siège) n weγlif.  
 
D Aseqqamu Unnig i Timmuzγa (HCA) ay d-yessuttren ad d-tili temlilit-a yernu d amaru amatu (secrétaire général) n weγlif (ministère) n usselmed akk d umaru amatu n Useqqamu Unnig i Timmuzγa ay d-yellan d iselwayen n temlilit.
 
 

Adeg i yiselmaden n tmaziγt

(06/04/2007)

Akk-n kan εeddan wussan-nni n ussileγ (formation) n yiselmaden n tmaziγt deg Zeralda (d asselmed yeṭṭfen snat n ledwaṛ), iselmaden n tmaziγt fehmen d acu ay d azal ay yezmer ad t-yesεu "usselmed n usenfar" (pédagogie de projet) u bγan ad d-stenfεen seg tikli-a tamaynut. D ay-a ay yejjan Arab Aguini, yellan d aselmad n tmaziγt deg Tubiret, ad d-yebnu adeg (site) n http://asenfar.ifrance.com. Adeg-a iga-t uqbel ma yebda-d kra n usenfar (projet) akk d yiselmaden-ines yernu mazal-it la iqeddec fell-as. Aguini la yettsefray ad yerr adeg-ines d win ay deg ara zemren medden ad d-afen isalan γef wakk ay-n la iḍerrun deg wenrar n usselmed n tmaziγt. Kemmel ...


Tafaska n tmedyazt tamaziγt deg Wayt Smaεil 

(04/04/2007)
 
alikhadaoui.jpg 
Tafaska taγelnawt n tmedyazt (poésie) tamaziγt tga-tt aseggas-a tiddukla n Adrar n Fad yellan texs (tebγa) ad as-terr tajmilt s tmeγra-a daγen i Dda Lmulud Mammeri. Tafaska-a tettwaxtem ass n ljemεa 30 deg Meγres 2007 s yiwet n tmeγra meγγren ay deg feṛḥen ama d wid yettekkan, ama d wid ay tt-id-igan, ladγa imi tafaska n useggas-a tgerrez.
 

 
 
 
 
 


Tiddukla Tadelsant Imedyazen
Association culturelle Imedyazen
BP 129 Poste Didouche Mourad
16006- Alger - Algérie
Tel. (+213) (0) 64 77 07 37