Tiddukla Tadelsant Imedyazen

Asebter n umager | Imagraden | Isalan | Imenzayen | Taftilt | Imawalen | Idlisen-nnegh | Leqdicat-nnegh | Imazighen | Lmed tamazight | English | Español | Français | Arabe | Anmager | Tabrat n Yimedyazen | Arum-agh-d | Imaslad'en | Tamesgida | Amezruy n Tiddukla

 

Asmekti n Mohamed Belaouche umi qqaren Ssi Muḥ U Lḥaj

 

Sebεa u ṛebεin n yiseggasen seg wamsi ay yemmut

 

Amdan ittettu amezruy (ttarix), maca amezruy werjin ittettu amdan. Llan kra n yergazen, ala d amezruy ay asen-yettarran tajmilt i lebda. Deg wass n 23 Tubeṛ 1960, yeγli Mohamed Beloauche d ameγras (ccahid) deg Teẓrut n Yinezliwen, s leslaḥ deg ufus. Belaouche yella d agenses (lieutenant) n wasun (zone) wis 4 n Twilayt tis 3. Ilul-d deg wass n 13 Dujembeṛ 1920 deg taddart n Tfuγalt, deg Imkiren (Tizi Wezz). Asmi ay yesεa εecrin n yiseggasen, yekcem, am waṭas n yelmeẓyen n tallit-ines, γer Ukabar n Weγref Adzayri (PPA – Parti du Peuple Algérie), γas akk-n yekker-d deg yiwet seg twaculin timeṛkantiyin akk n taddart. Mohamed Belaouche yella d amzenzu (ttajer) u yelmed Leqran, dγa d ay-a ay t-yejjan ad yessen mliḥ taεṛabt.

 

Mohamed Beloauche yella d argaz ufhim u itteddu s tezdeg deg tudert-ines, d ay-a ay t-yejjan ad yesseqneε aṭas n yelmeẓyen ad kecmen γer Ukabar n Weγref Adzayri (PPA), sakk-in, asmi ay qrib ad d-tekker Tegrawla, yeqqel yesseqnaε-iten ad ttekkin deg ussewjed n yimenγi imselleḥ. Yagi, deg yiḍ n 31 Tubeṛ ed umezwaru n Nwembeṛ 1954, tettunefk-as, netta ed yimeddukal-ines, yiwet n tuγdaḍt (mission) deg Blida. Dγa ass-nni ay iga leqdic-ines amezwaru deg Tegrawla.

 

Beloauche yettekka deg waṭas n yimenγiwen deg yiwet n tkebbanit (compagnie) n Tama (région) tis 2, u iban-d d argaz yesεan tabγest (lkuṛaj). D ay-a ay yejjan imḍebbren-ines ad as-fken tafesna (legṛad) n ugenses (lieutenant).

 

I lmend n wesmekti n wass ay deg yemmut, nṛuḥ neẓra-d yiwen seg yimeddukal-ines, Σemmi Rabah Bendif. Aneggaru-a yenna-aγ-d belli Mohamed Belaouche yettekka deg wekmin (embuscade) ay gan deg ”wemkan wis 9” deg Sidi Σli Bunab, akk ed wekmin n Lmusem (Elmoussem) ay d-yellan din daγen. Belaouche yettekka deg yiwen n yimenγi d ameqran deg Ayt Seεda, am wakk-n yettekka deg wekmin ay gan deg Ibuεezzunen, deg tama n Tizi Wezzu, sdat n Timezrit.

 

Σemmi Rabah yerna-aγ-d belli Ssi Muḥ U Lḥaj yettekka deg yimenγi-nni ameqran ay d-yellan deg 6 Yennayer deg Ayt Yeḥya Musa, ay deg sṛuḥen yiserdasen (iεsekṛiyen) n Fṛansa agenses (lieutenant) Graziani ed useṛjan (sergent) Chassin, am wakk-n ay aγ-d-yeḥka Σemmi Rabah s ttfaṣ̣il imenγi n Icuqren (Ichoukrene) deg tama n Dreε Lmizan : ”Tella yiwen n teγlamt (convoi) n yiserdasen (iεsekṛiyen) ay d-yettεeddin tikkelt i dduṛt γef ttesεa n tṣ̣ebḥit γef taddart-nni [Icuqren]. Dγa neεzem ad ten-nwet. Nṛuḥ seg Tfuγalt γer Icuqren. Neqqim neγγaz iṭranciyen s teγzi n yiḍ, acku nella deg yiwen n wemkan ifeḍḥen. Aγella-nneγ (ccaf) Akli Hamraoui yenna-aγ-d ad neffer deg-sen. D acu kan, azekk-anni, tεedda-d yiwet n tmezzayt (patrouille) n ussenqed uqbel ma tεedda-d teγlamt-nni. Dγa yexṣ̣er leḥsab-nneγ. Γas akk-n, nemyuṭṭaf ed tmezzayt-nni. Nessaweḍ ad nenγ εecrin deg-sen, alama ay rewlen γer taddart ay menεen”.

 

Σemmi Rabah yerna-aγ-d yiwet n tγawsa s wazal-is : ”Cfiγ γef wasaḍ-nneγ (héros). Γas akk-n yella yekreḥ ussan-nni, d netta ay d amezwaru ay iqerrsen (tirer) γef weεdaw. Ssi Muḥ U Lḥaj yeṭṭef tameẓyant (taḥeṛṛast) s yiwen n ufus imi afus-ines niḍen yella icudd. Ula mi akk-n nella neγγaz aṭranci, aγella n tkebbanit (chef de compagnie) ur t-yejji ara ad yeqdec id-neγ u d wayeḍ umi yenna ad yeγz deg wemkan-is. Mi bdan Yefṛensisen la aγ-d-kkaten s lemdafeε, nerwel-d γer Tamda n Σli, sakk-in Ssi Muḥ U Lḥaj yuwey-aγ alama ay d Taγzut, anda ay d-yezga wurti-ines, u necca din lfakya alama ay neṛwa”. Amjahed ay nesseqsa yeḥbes ciṭṭ akk-n ad d-yemmekti awal ay asen-yenna Mohamed Beloaouche deg wurti-ines : ”Ccet amzun deg wayla-nwen ay tellam, ccet, kenwi d arraw-iw, ur sεiγ ara iqcicen, ala yiwet n yelli ay sεiγ”.

 

Agenses (lieutenant) Belaouche yettekka deg yimenγiwen niḍen. Hacene Belaouche, d anagi niḍen yessnen Ssi Muḥ U Lḥaj, nesseqsa-t u yeḥka-aγ-d belli : ”Deg 1956, Ssi Muḥ ed yimeddukal-ines gan yiwen n wekmin deg Tamdikt, deg webrid aγelnaw (route nationale) 68, gar Tizi Γennif ed Yesser. Ass-nni, yella wagu. Ssi Muḥ U Lḥaj ed yimeddukal-ines nsan deg yiwen n llangaṛ. Deg tfejrit, mi akk-n mazal agu-nni n tṣ̣ebḥit, Ssi Muḥ U Lḥaj ed yergazen-ines wten taγlamt-nni (convoir) ay llan ttṛajun. Ass-nni mmuten aṭas n yiserdasen n Fṛansa. Maca daγen γlin kra n yimeγrasen (ccuhada), wi d Abdellah Adjab, Arezki Bekhat ed yiwen qqaren-as Hanou”.

 

Sdeffir ma yemmut weknaner (coloner) Amirouche deg 1959, u yerna deffir-s uγella n wasun (chef de zone) Ali Bennour, deg wass n 21 Tubeṛ 1959, ur msefhamen ara wid iḥekmen Tawilayt tis 3. Dγa yeffeγ Belaouche seg wasun wis 4 n Twilayt tis 3, u iṛuḥ γer Twilayt tis 4, anda ay ikemmel imenγi alama ay d asmi ay yemmut. Rabah Bendif ifuṛes tagnit n tejmilt-a akk-n ad as-yedεu i Ssi Muḥ U Lḥaj ad t-yessezdeγ Ṛebbi deg Ljennet-ines.

 

Seg Dépêche de Kabylie - Laṛebεa, 24 Tubeṛ 2007 – Uṭṭun 1641

 

Sγur Amar Ouramdane

Tasuqilt sγur Omar Mouffok


 
 
 

Tiddukla Tadelsant Imedyazen
Association culturelle Imedyazen
BP 129 Poste Didouche Mourad
16006- Alger - Algérie
Tel. (+213) (0) 64 77 07 37