Iselmaden imguta* n tmaziγt n Tubiret ed wuguren-nsen

*amgatu (imguta) : contractuel

10 Tubeṛ 2007

Iselmaden imguta (contractuels) n tmaziγt deg Tubiret gguman ad rren aḍar γer deffir yerna mazal-iten la ttkemmilen timeskanin (timesbaniyin) akk-n ad ten-rren s imukan-nsen n leqdic.

Iselmaden-a la ttḥulfun i yiman-nsen ttwaḍelmen, yettwakkes-asen wezref-nsen (lḥeqq) yerna sdeffir ma sqedcen-ten d iseggasen, tura ttwaxedεen. Γef way-a, seg wasmi ay d-tebda tuqqla (rentrée) γer uγerbaz (llakul) ara ttnadin anwa ara asen-yefrun uguren-nsen, maca deg lbaṭel.

Naqal ṛuḥen alama ay d tanersut (siège) n Weγlif n usselmed aγelnaw (Ministère de l’éducation nationale) deg Ldzayer tamaneγt, sakk-in, xmesṭac n wussan ay-a, gan tiγimit n tmeskant (sit-in) sdat n tkadimit n Tubiret, u εerḍen ad reglen anekcum n tkadimit. Iγallen n laman staxren-ten s yiγil, d ay-n ay ten-yejjan ad kemmlen tiγimit-nsen mebla ma iṣ̣aḥ-iten-id wacemma akk-n ad frun ugur-nsen.

Iselmaden-a, deg xemsa u tlatin id-sen, gan tikli, deg wass n laṛebεa iεeddan (3 Tubeṛ 2007) deg temdint n Tubiret, u wwin-d id-sen tiḥucay. Llan kra n yimeddukal ay d-yeddan id-sen, gar-asen kra seg wid yettekkan deg umussu aγerman (mouvement citoyen), iγermanen ed yinelmaden ay d-yuwyen id-sen iqraben (cartables). Wi akk ddan deg tikli-a, γas akk-n d aẓγal yerna Remḍan yessefcal. Wid yettekkan deg tikli-a gan tiγimit n tmeskant (sit-in) sdat n tnersut (siège) n Tmehla n usselmed (Direction de l’éducation), sakk-in ṛuḥen γer tnarut (bureau) n lwali u imir-n ddan id-sen yemsulta (ibulisen).

Sdeffir ma qqimen acḥal nitni ttṛajun, imḍebber n teγlamt (chef de cabinet) n lwali yeqbel ad yemyagar ed yiwet n terbaεt seg yiselmaden-nni akk-n ad iεawed ad isel i tikkelt niḍen ay-n la d-ssutturen, mebla ma yefka-asen-d kra n tifrat. D ay-a ay yejjan iselmaden-nni ad qqlen s ixxamen-nsen mebla ma gan-d acemma, ulawen-nsen wwan, d acu kan, ur gzimen ara assirem yerna mazal la ssefrayen ad gen timeskanin (timesbaniyin) alama d asmi ara ”ten-rren s yimukan-nsen”.

Γef leḥsab n yiwen seg yiselmaden yettekkan deg tmeskanin-a (timesbaniyin), ugur netta d imḍebbren n tkadimiyin ur la nettqadar ara lewṣ̣ayat ay d-yettafk Weγlif (ministère), ladγa tid yerzan ay-n yerzan amḍan (nombre) n yiselmaden n tmaziγt. Deg twilayt n Tubiret la ssefrayen ad ssiwḍen imukan n usselmed n tmaziγt γer meyya, maca ur la d-rennun ara iselmaden imaynuten, d ay-a ay yejjan iselmaden iqeddcen yagi ad d-izad fell-asen leqdic, deg lweqt ay deg iselmaden imguta (contractuels) ssuffγen-ten seg leqdic yerna mazal-iten la ssutturen ad ten-rren u ad asen-fken amkan ara idumen.