|
Tutlayin timuddirin merr'a sâant, ass-a, ttawilat i yes ttidirent, ttawilat i yes d-ssawad'ent isallen,
u d wid inefâen medden di tudert-nsen n yal ass. Yal d tutlayt tesâa tisufagh, ighmisen d tesghunin yeqqnen ger n trebbaâ
ay tt-yettmeslayen, ay yettidiren yis-s. Dgha, ula d tamazight yessefk ad tesâu ttawilat n ussiwed' i yes ula d nettat ad
tenfeâ i kra, ad d-tessiwed' isallen i wid ay tt-yesseqdacen. Ghef waya ara nesseh'r'as ach'al aya i wakken ad d-nerr tasghunt-nnegh,
Taftilt s annar, i wakken ad tili d yiwen si ttawilat ara yeddjen tutlayt-nnegh ad tagh amkan-is ger tutlayin nnid'en n ddunit
n wass-a.
Taftilt nebgha ad tili d tasufight yuran s tmazight si tt'erf alamma d tt'erf. Deg-s, nebgha ad d-nawi awal
ghef wakk timsal n tudert, n ddunit, s tutlayt-nnegh, i wakken ad d-neldi abrid i usseqdec n tutlayt-nnegh deg yinurar merr'a.
Yugh lh'al, ass-a nga tamawt dakken at'as seg wid yettarun tamazight, rran tutlayt-a gher yiwen ujeghlal, d win kan n lumur'
tiqdimin, d wayen icudden gher tsekla, u ttbanen-d dakken ttun dakken tamazight d tutlayt tamuddirt, d tin ay nebgha ad teddjudjeg
u ad d-temyezg d tallit n wass-a, ad teddu d zzman-nnegh. Ur ilaq ara ad nerr tamazight d tameh'bust n zzman aqdim, n tallit
i deg ay tella tedder kan deg yilsawen, wanag, mi ara d-nini dakken nebgha ad d-nessuffegh tamazight deg wennar n tetlayt
(timawit) gher wennar n tira, a win yufan ad tt-nessekcem daghen s annar n wayen yellan d amaynut, d atrar yernu yemâen (maci
d ayen icemten).
Asmi ay tekcem tmazight s annar n ttawilat n ussiwed', ladgha deg yiseggasen ineggura, llant at'as
n lumur' ay d-tekseb tutlayt-nnegh. Ineghmasen n rr'adyu d tilibizyu qqlen la ttmeslayen ghef wat'as n tghawsiwin, nella
zik, ur nugh ara tanumi nettawi-d fell-asent awal s tmazight. Maca, deg wennar n tira, yettban-agh-d dakken mazal-agh la neqqen
kan gher tsekla yernu nettkukru ad naru ghef tghawsiwin nnid'en. Akken nwala di tesghunin timazighin ay d-yeffghen deg
wayen akka iâeddan, tighawsiwin merr'a icudden gher tudert tatrart, gher tussna, tasertit, amezruy, atg. ttawin-d fell-asent
awal s tefr'ensist, wanag tamazight s'ah'en-tt-id kan yisefra d kra n yed'risen ur nzad ara. Ghef waya ay nebgha ad d-nerz'
asalu, ad d-neg tasghunt ara d-yettawin awal ghef kullec s tutlayt-nnegh, d amezruy, d tussna, d tujjya, d taknussna
(technologie), timetti negh tasnafsit (psychologie), imeghriyen zemren ad d-afen di tesghunt-nnegh imagraden
(articles) ghef wakk inurar, yernu yal yiwen yezmer ad d-yaf di tesghunt-nnegh ayen ih'emmel, u ad t-igher
s tutlayt-is, s tmazight.
Yessefk daghen ad d-nger tamawt dakken ar ass-a, mazal qlilit medden ay yeqqaren s tmazight. Neqqar u nettaru
s tutlayin merr'a, ala d tamazight, tutlayt-nnegh, ay nerra di rrif. Mazal-itt kan tedder deg yilsawen-nnegh, akken yella
lh'al si zik-nni. Xas akka at'as ay nga i wakken ad as-d-nawi azref-is (lh'eqq-is) i tmazight, xas nest'uqqet awal ghef
temsalt n uâeddi n tmazight si tetlayt (timawit) gher tira, maca mazal-agh kan la nettkemmil la tt-nettmeslay mebla ma
nura-tt. Nnig waya, llan at'as n medden ddjan-tt, ula d awal ur a tt-ttmeslayen ara. Citt'-nni ay d-yegran seg-s, kemmlen-as, imi
ass-a tafr'ensist tekcem ula s ixxamen-nnegh, di Tmurt n Leqbayel, ay yellan zik d leh's'in i deg tedduri tmazight. Ass-a,
aql-agh la nettidir di tallit i deg tutlayin idjehden la h'err'sent tid id'eâfen, yernu tin yernan tayed', ad tt-tettc. Tutlayin
idjehden ghur-sent at'as aya seg wasmi ay kecment s annar n tira, yernu srekdent iman-nsent deg-s. Dgha ula d nekni,
ass-a, ma nebgha ad teslek tutlayt-nnegh, yessefk ad tt-nwehhi s abrid i seg âeddant akk tutlayin nnid'en, d win n tira
akk d ussuffegh (publication). Dimi ay nebgha ad tili tesghunt-nnegh d ttawil ara yeldin tawwurt i medden, xas d
tamect'uh't, i wakken ad qqaren tamazight sya gher da, u ad aghen tanumi d tutlayt-nsen.
Mbeâd ma nessuffegh-d kra n wutt'unen deg yiseggasen n 1990, Taftilt teh'bes ach'al n yiseggasen, ur d-teffigh
ara. Sakkin, deg useggas n 2004, neâred' ad tt-id-ner s annar s citt'-nni n ttawil ay yellan ger yifassen-nnegh, u nerna nessuffegh-d
sin wutt'unen nnid'en. Maca, tikkelt-a, nessaram ad nezmer ad tt-id-nerr s annar akken iwata, ad tt-id-nessuffegh deg wexxam
n tez'rigin, u ad tenz di ssuq, anda ay zemren ad tt-id-afen wat'as n medden.
Nessaram kan dakken tasghunt-nnegh ad taf imeghriyen ara tt-yeqqaren yal d tikkelt i deg ara d-teffegh,
acku, imeghriyen n tmazight xuss'en mlih'. Nessaram dakken agbur n tesghunt-nnegh ad yeâdjeb medden, u ad yili waya d ssebba
ara tt-yeddjen ad tidir, ma yebgha R'ebbi.
|
