Tiwsatin timensayin n tesrit taqbaylit* n Mhamed Djellaoui

*Genres traditionnels de la prose kabyle

Ass-a, la ttedder deg yiwet n tallit ay deg llan waṭas n yilsawen la itteddun akk-n ad negren, yerna, γef leḥsab n yiwet n tezrawt (étude) n Unesco, ula d tamaziγt tezmer ad tili seg-sen. Γef way-a ay yessefk γef yiles-nneγ ad yezmer i yiman-is akk-n ad yeḍmeε ad temneε seg wengar.

Ass-a, la d-qqaren belli tamaziγt tessaweḍ ad d-teffeγ seg tallit n tatlayt (oralité) u teqqel d iles yettwarun, maca, γef wakk-n nettwali, idlisen ay d-itteffγen s tmaziγt mazal-iten qlilit aṭas. Ay-n akk-n yellan deg tatlayt yessefk ad t-naru, yerna mazal yegguni-aγ ccγel d ameqran deg wenrar-a.

Tiwsatin timensayin n tesrit taqbaylit (Genres traditionnels de la prose kabyle) d adlis amaynut la yettnuzun ussan-a deg tnedlisin (librairies), yura-t-id Mhammed Djellaoui ay d-yessuffγen yagi idlisen niḍen.

Deg wedlis-a, nezmer ad d-naf tumgisin (mythes) am Teslit n wenẓar, tiqsiḍin (légendes) ed tmucuha, inzan ed temsefra. D acu kan, γas ma yella taqbaylit d tameṛkantit, ur yessefk ara ad nejj timmeṛkantit-nni-ines ad teqqar u ad tettwattu, acku ay-a ad yesswaγ azekka n yiles ed yedles-nneγ.

Adlis-a yettarra-aγ γer tallit n zik, asmi ay llant twaculin deg Tmurt n Leqbayel ur sεint ara akk ttawil ay yes ara zhunt neγ ad slent i yisalan, menγir timucuha, tiqsiḍin (légendes) ed temsefra (timseεraq), yerna s ti akk ay llan tekken aḍan-nni γezzifen n tegrest, rrif n lkanun, yerna yes-sent ay d-ttuṛebban acḥal n lejyal n yigerdan. Ass-a, tigemmi-a (patrimoine) mazal tesselmad-aγ-d aṭas γef wamek ddren lejdud-nneγ ed wamek tella ddunit deg tallit-nsen. 

Seg tama niḍen, aṭas ay d-ileqḍen inzan uqbel n Djellaoui, ma d netta, wid-nni ay d-yuwey deg wedlis-ines ddan-d deg-sen kra werjin ttwaleqḍen-d, yerna netta yessefk ad nẓer belli inzan ttemgerraden seg tama γer tayeḍ. Djellaoui yelqeḍ-aγ-d 201 n yinzan, gar-asen 31 seg tama n Wewras, tamurt n Yicawiyen.

Inzan, Djellaoui yebḍa-ten γef 9 yisental (thèmes) : agama (nature), lqaεa ed yigenwan, tafekka (ljetta) n wemdan, amaḍal (ddunit) n tfellaḥt, isufar n wucci, iγersiwen, tudert n wemdan ed ddyana.

Adlis-a, ulac ccek belli ad yessefṛeḥ inelmaden ed yiselmaden n tmaziγt ed wid yebγan ad d-ssukksen u ad gen leqrar i yedles-nsen. Yessefk kan ad d-nesmekti belli adlis-a d Aseqqamu Unnig i Timmuzγa (Haut Commissariat à l’Amazighité) ay t-id-yessuffγen.

Seg La Dépêche de Kabylie n 16 Tubeṛ 2007, uṭṭun 1634

Sγur S. Amrane