Make your own free website on Tripod.com

Tiddukla Tadelsant Imedyazen

Asebter n umager | Imagraden | Isalan | Imenzayen | Taftilt | Imawalen | Idlisen-nnegh | Leqdicat-nnegh | Imazighen | Lmed tamazight | English | Español | Français | Arabe | Anmager | Tabrat n Yimedyazen | Arum-agh-d | Imaslad'en | Tamesgida | Amezruy n Tiddukla

 

Awfus* amaynut n tutlayt tamaziγt n Sadeq Bendali 

 

*adlis n usselmed (manuel)

 

Tamaziγt, am waṭas n yilsawen niḍen ass-a, la tt-tettxatal lmut, wid tt-yesseqdacen simal la neqqsen, asselmed-ines simal itteqqel γer deffir, dγa γef way-a, i lmend n ussemneε-ines, kra n yemnuda, isdawanen (universitaires) ed yiselmaden ssuffuγen-d idlisen i yinelmaden ed medden niḍen yebγan ad issinen tamaziγt, u tikkwal ssuffuγen-d idlisen-a s yedrimen-nsen.

 

Aseqqamu Unnig i Timmuzγa (Haut Commissariat à l’Amazighité) yessuffeγ-d, deg wayyuren-a ineggura, yiwen n wedlis n Sadeq Bendali isem-is Awfus (manuel) amaynut n tutlayt tamaziγt.

 

Adlis-a, mebla ccek, yenheg-it-id (inspirer) bab-is seg Tjeṛṛumt n tmaziγt n Mouloud Mammeri, ad t-yeṛḥem Ṛebbi. Bendali yesselmad deg-s tmaziγt seg tlata n tmiwa : s tajeṛṛumt (grammaire), s tsekla (littérature) u s tmeẓẓult (logique). Ad naf deg wedlis-a tibuda n yilugan (définitions de règles) ed yimedyaten (exemples) yemxallafen ed tfelwiyin (tableaux) n ussefhem i lmend n ussisfses n wefham. Assefhem deg wedlis-a yella-d s tmaziγt, maca bab-is yefka-d tasniremt (terminologie) s tefṛensist akk-n ad zemren ad t-sqedcen medden xir.

 

Adlis-a yebḍa γef ḥdac yixfaxen (chapitres) : Isem ed yeglem (adjectif) ; amyag ed tseftit-ines (verbe et sa conjugaison), assuddem (dérivation), imqimen (pronoms), tinzaγ (propositions), tisγunin (conjonctions) ed yimerna (adverbes), tiwuriwin n yisem (fonctions nominales), tafyirt ed ussumer (phrase et proposition) ed tesleḍt (analyse).

 

Sadeq Bendali, deg tezzwart n wedlis-ines yenna-d : ”Kenwi s wid yebγan ad ssalin aswir-nsen (niveau) deg yiles amaziγ, ama d wid ilemmden neγ d iselmaden, neγ d wid kan ay d-yerran lwelha-nsen γer yiles n Yergazen ilelliyen, nessaram ad nili nuwey-awen-d, s wedlis-a, ay-n ara ken-iεawnen, γas s cwiṭ, akk-n ad tawḍem γer way-n tebγam”. 

 

”Adlis-a nebγa-t ad yili d ttawil igerrzen ara ken-yejjen ad ssilqyem tamussni-nwen deg tmaziγt. I wakk-n ad d-sfaydin seg-s medden mliḥ, nesseqdec ula d tafṛensist. Dγa nessedda-d assefhem ed tsuqilt (traduction) n wawalen n tjeṛṛumt s tefṛensist ...”

 

Deg tgara, yessefk ad d-nini tamaziγt, am wakk ilsawen la yettaεraḍ ad d-smenεen iman-nsen seg nnger, teḥwaj idlisen, yerna yal adlis ara d-yeffγen i lmend-is nesteṛḥib yes-s, yerna mi ara nẓer belli assuffeγ n yedlisen s yiles n Muḥya mazal-it ixuṣ̣ṣ̣, neqqar-as ad win yufan ad rnun ad d-ffγen yedlisen igerrzen am win n Bendali.

 

 

Seg Dépêche de Kabylie, 22 Tubeṛ 2007 – Uṭṭun 1639

Sγur Salem Amrane

Tasuqilt sγur Omar Mouffok
 

Tiddukla Tadelsant Imedyazen
Association culturelle Imedyazen
BP 129 Poste Didouche Mourad
16006- Alger - Algérie
Tel. (+213) (0) 64 77 07 37