Taqbaylit tezmer ad tenger γef leḥsab n yiwet n tezrawt* n UNESCO

* Tazrawt : étude.

(Dépêche de Kabylie, 19 Ctembeṛ 2007)

Imuzzag (spécialistes) n UNESCO seg melmi kan ay fuken yiwet n tezrawt (études) ay gan γef teγzi n leεmeṛ n yilsawen (lluγat). Tazrawt-a tekcef-d belli 10 yilsawen ay yettmettaten deg useggas deg ddunit.

Tamurt ay deg negren aṭas akk n yilsawen d Ustṛalya. Zik, llan ttusseqdacen deg tmurt-a 400 yilsawen, ma ass-a, qqimen-d kan 25 seg-sen.

Γef leḥsab n wid d-igan tazrawt-a (étude), iles yesεan ugar n umelyun n medden ay t-yesseqdacen mazal yezmer ad yedder azal n xemsin n yiseggasen neγ ugar, maca ay-a yeqqen daγen γer wamek yettusseqdac yiles-a ed yinurar anda ay yettusseqdac.

Maca imnuda (chercheurs) yettekkan deg tezrawt-a (étude) nnan-d ssebbat yettajjan ilsawen ad negren ur qqinent ara dima γer tussna, wanag ula d tasertit (politique) tetturar dduṛ deg way-a. Yuγ lḥal, uguren n tsertit tikkwal sseεjalen-d nnger n yiles.

Dγa, γef leḥsab-agi, ula d taqbaylit, tamẓabit, tacawit, tacelḥit yellan akk d tisneflin (variantes) n tmaziγt atenti ddrent kan seg leεḍil, taswiεt-agi kan, u zemrent ad negrent sya ar sdat. Nnig way-a, ma neqqim kan deg teqbaylit, γas ma yella llan ugar n umelyun n Yeqbayliyen ay tt-yessawalen, tantala-a (dialecte) mazal-itt teqqim γer deffir, tεeṭṭel aṭas akk-n ad d-tarew tiγawsiwin ay d-urwen yilsawen niḍen, tεeṭṭel akk-n ad tennerni u ad tejjujjeg, yerna ay-n yernan yessewεeṛ ay-a netta d tagnit tasertit (politique) ay deg tella teqbaylit. D ay-a ay yejjan tantala-a ad tteqqel γer deffir, γas ma yella kra seg waggagen-nneγ (intellectuels) qedcen γef wugur-a akk-n ad tt-ḥerzen, u gar-asen nezmer ad d-nebder Mammeri, Djaout, Salem Chaker d waṭas n yemdanen niḍen. Wigi akk jjan-d allalen (outils) i lmend n usselmed n teqbaylit yerna allalen-a d wid ara inefεen i wesnerni n yiles-a.

Tazrawt-a n UNESCO tebder-d daγen Cameroun akk d Niger seg gar timura n Tefriqt ay deg negren kra n yilsawen deg εecṛa-agi n yiseggasen ineggura. 

Sγur Khaled Zahem

La Dépêche de Kabylie n 17/09/2007

Deg udeg-nneγ llan ugar n yisalan γef yilsawen la itteddun akk-n ad negren, rzut γef wuṭṭunen n Tebrat n Yimedyazen :