Tiwwura yeldin ghef ugezdu n Tizi Wezzu

Wigi akk gan yiwen n usarag (conférence) deg wass n 19 Yebrir deg tekrict (crèche) n tγiwant (commune), u ssawlen-d γef « Wuguren n tmaziγt : ay-n yettwagan d way-n yeggunin » (La problématique amazighe : bilans et perspectives). Asarag-a ḥedṛen deg-s yiselmaden n tmaziγt, wid yettekkan deg tiddukliwin, imeγnasen (militants) n tmaziγt d kra n yinelmaden n ugezdu n tmaziγt n Bgayet. Wid ay d-yessawlen deg-s bedren-d isurifen ay tga tmaziγt γer sdat seg wasmi ay yettwaldi ugezdu n tmaziγt n Tizi Wezzu deg yiseggasen n 1990, yernu ssawlen-d γef umecwaṛ γezzifen n leqdic ay d-mazal yegguni tamaziγt. Gar temsal ay γef d-yella weskasi (débat), nezmer ad d-nebder assizeγ (standardisation) n yiles amaziγ, assuffeγ n yedlisen d way-n niḍen s tmaziγt, asnulfu s tmaziγt d teẓri n tsekla (théorie de la littérature), yernu d imdanen ay d-yesεan ttejṛiba deg temsal-a ay iḥedṛen deg usarag. Deg temlilit-a daγen, rran tajmilt i yimezwura deg yimenγi γef tmaziγt, d imdanen ay yemmugren aqmaḍ (répression) n leḥkem amesbaṭli mebla tugdi. Yagi, uqbel ma bdan leqdicat-a akk, wid yettekkan gan ddqiqa n tsusmi i lmend n wid yefkan tudert-nsen d asfel. Nnig usarag-a, tettwaga yiwet n temzikkent (exposition) deg wexxam n yelmeẓyen n Weqbu, ssersen-d deg-s tiqendyar n Leqbayel, tikla (peintures) γef leḥrir, tugniwin (tteṣ̣wirat) n yinuẓar (ifennanen) d wid yettwassnen deg umezruy amaziγ, tugniwin n tγawsiwin tiqburin akk d yimagraden (articles) n yeγmisen (ijeṛnanen). Ma deg tzeqqa n ssinima n 20 Γuct, gan yiwet n temsizwert (concours) gar tesnawiyin (lycées) n Weqbu d Yeγzer Ameqran, d tin ay deg d-fkan isteqsiyen ala kan γef yiles d yedles amaziγ.