|
Yella yiwen n sselṭan, deg zzman amezwaru, yuγ sebεa tilawin. Urwent-d, ğğant-d
arrac i sebεa. Yiwet deg-sent d taklit. Alamma ay d asmi meγγrit warrac-nni i sebεa, sselṭan yettqellib
ad asen-yejweğ. Ur yufi ara dinna, deg tmurt-is. Slan s yiwen n sselṭan, deg tmurt niḍen, γur-s sebεa
teḥdayin. Kkren, nnan-s i baba-tsen : "Nekni ad nṛuḥ ad nejweğ". Yenna-asen : "Ṛuḥet ay
arraw-iw". Yefka-asen idrimen, yerna-asen ijedεan. Rekben, ṛuḥen. Alamma ay wwden γer yiwen n wemkan,
yeγli-d fell-asen yiḍ. Nsan dinna. Nnan-as wagar-asen : "Anwa ara iεassen deg-neγ fell-aneγ ?".
Yenna-asen yiwen : "D nekk ara iεassen".
Alamma ay d iḍ, yeffeγ-d fell-asen yizem. Iwet-it, yenγa-t
uεessas-nni. Wiyiḍ ṭṭsen, ur ukin ara. Alamma ay d-kkren, ṣ̣ṣ̣beḥ, aqcic-nni
yewwi afus n yizem-nni yenγa. Ṛuḥen d webrid-nsen, ulac γur-sen lexbar s weqcic-nni yenγa izem.
Alamma ay wwḍen γer wemkan niḍen, d tameddit, rsen, nsan dinna.
Yekker-d wayeḍ, yenna-asen
: "Iḍ-agi d nekk ara iεassen". Nnan-as : "Σass". Nitni ṭṭsen, netta iεuss. Alamma ay d nnṣ̣af
n yiḍ, yeffeγ-d fell-asen wemkiraw. Iwet-it, yenγa-t uεessas-nni. Wiyiḍ ṭṭsen, ur ukin
ara diγen am wass amezwaru. Igzem-d netta afus n wemkiraw-nni, yewwi-t ula d netta yid-s diγen. Kkren-d ṣ̣ṣ̣beḥ,
ṛuḥen.
Wwḍen γer yiwen n wemkan, d tameddit. Ufan tala. Nnan-as : "Tura, nekni aql-aγ neεya,
iḍ yeγli-d; tura nekni ur nettaf ara yiwen wemkan am wagi i yiḍes. Ad nens dagi. Llan waman dagi, ay axir-aγ.
Win ifuden ad isew, win yebγan tarda, yessired".
Nsan dinna. Yekker-d umecṭuḥ-nni deg-sen, Mḥemmed mmi-s n taklit, yenna-asen : "Iḍ-a
ay aytma, d nekk ara iεassen". Nnan-as : "Σass". Iεuss. Alamma ay yenṣ̣ef yiḍ, teffeγ-d
fell-asen Teryel deg tala-nni, γur-s sebεa yiqerray. Yekker γer-s, yegzem-as iqerray-nni i sebεa. Aytma-s
ṭṭsen, ur d-ukin ara.
Iwala tafat γer yiwen n umadaγ. Yenna-as : "Nekkini ad ṛuḥeγ γer tafat-inna.
Yak aytma tura, Teryel-nni ara ten-yeččen aql-i nγiγ-tt; ma d nitni ata-n ṭṭsen; ma d
nekk ad ṛuḥeγ". Iṛuḥ. Yufa sin, yiwen ittellem amrar n cceεṛ [ucebbub] aberkan, wayeḍ
n cceεṛ amellal. Yenna-asen : "Acu txeddmem akk-a ?". Nnan-as : "D nekni ay d-yesseγlayen iḍ, d nekni
ay yessalayen ass". Yenna-asen : "Ihi, deg leεnaya-nwen, sγezfet iḍ-agi akk-n ur d-ttakin ara waytma, ata-n
ad ṭṭsen, nekk ad ṛuḥeγ γer tmes-inna ay yettbanen def umadaγ-inna". Nnan-as : "Ṛuḥ".
Iṛuḥ. Alamma ay yewweḍ, yufa ṛebεin n yiriliwen. Bnan axxam imir, zlan azger
imir, ssewwen-t imir. Netta γer-s tacacit, mi tt-yelsa, ur t-iẓerr ḥedd [yiwen]. Yekcem gar-asen. Ssersen-d
tabeqsit ad ččen imensi, ssersen-d ṛebεin n tγenğayin. Yerfed yid-sen. Txuṣ̣ṣ̣
yiwet. Nnan-as wagar-asen : "Sserset tiγenğayin, refdet qbel aksum". Ssersen-d ṛebεin n tecriḥin.
Refden aksum. Ufan txuṣ̣ṣ̣ diγen yiwet. Nnan-as : "Sserset". Ssersen. Yessers ula d netta yid-sen.
Σudden. Ufan ṛebεin. Nnan-as : "Refdet". Refden. Ufan diγen txuṣ̣ṣ̣ yiwet. Nnan-as
: "A wagi ay yellan yid-neγ, εeyyen-d iman-ik. Nεuhed-ik ur k-nečči, yerna ad k-nesseεlem aniwer
ara nṛuḥ ma tebγiḍ ad tedduḍ ula d kečč yid-neγ.
Yenṭeq-d, yenna-asen : "D nekk". Yekkes tacacit. Walan-t. Nnan-as : "Tura, nekni nezla azger, tura
nessewwi-t, tura kečč, ur yessin ḥedd [yiwen] ansi ay d-tṛuḥeḍ, ad teččeḍ
yid-neγ". Yenna-asen : "Tagi d lqesman, yeqsem-iyi-t Ṛebbi". Nitni xezren-t, bγan ad t-ččen. Nnan-as
wagar-asen : "Ṛju tura ad t-njeṛṛeb, ma yezmer i yiman-is neγ ma ur yezmir ara, ad t-nečč".
Nnan-as : "Kker, rfed tasilt-agi, ma tzemreḍ-as, neḥṣ̣a-k ad tedduḍ yid-neγ". Tasilt-nni
reffden-tt i ṛebεin, srusun-tt i ṛebεin. Netta yekker yessers-itt s yiwen n ufus, yerfed-is s yiwen
n ufus. Nnan-as : "Tura neḥṣ̣a-k tzemreḍ i yiman-ik, ad tedduḍ yid-neγ". Nnan-as : "Nekni
aql-aγ ad nṛuḥ γer yiwen n sselṭan, nesla yis-s γur-s sebεa teḥdayin. Tura ad
nṛuḥ ad tent-id-nawi". Yenna-asen : "Ula d nekk γer din ara leḥḥuγ".
Ṛuḥen
d webrid. Netta ileḥḥu, ileqqeḍ alqafen. Alamma ay yessaweḍ ṛebεin, yejmeε-iten. Alamma
ay wwḍen γer temdint n sselṭan-nni, yenna-asen : "Ṛjut. Tura ad aliγ nekk d amezwaru, ad awen-d-ttaṭṭafeγ
afus". Nnan-as : "Ali". Netta yuli. Nitni, la yessalay yiwen, yiwen. Win ara yalin, yegzem-as aqerruy-is, iḍegger-it
γer daxel. Win umi ara yegzem aqerruy, iḍegger yiwen walqaf, alamma ay ten-yegzem i ṛebεin. Yers-d,
iṛuh-d.
Sselṭan yuki-d. Yesla-d idammen ttazzalen. Iluεa taklit, yenna-as : "Kker, awi-iyi-d kra
n waman-agi yekkaten am Bir Zemzem, d lεali-ten, deg-sen lbaṛaka". Tekker taklit, tsemdi aqedduḥ. Yeččuṛ-d
uqedduḥ-nni. Tewwi-as-t-id. Nettat ur twala ara i wakk-n ara teεqel d idammen. Tenna-as : "Kker a sidi. Hata uqedduḥ
n waman". Yenna-as : "Anef-as". Yekker-d netta, yuγ luḍu. Yeẓẓul, yuγal [yeqqel] γer yiḍes.
Akk-n ur d-yewwi s lexbar d idammen, netta iγil d aman kan.
Mḥemmed mmi-s n taklit, yuγal-d [yeqqel-d]
γer waytma-s, yufa-ten-id mazal ṭṭsen, mazal iḍ. Iṛuḥ γer win iberrnen amrar,
yenna-as : "Ssali ass, beṛka abran". Yeqḍeε amrar-is, yuli wass.
Iṛuḥ-d, yessaki-d aytma-s,
yenna-asen : "Kkret. Tura ad nṛuḥ, ass yuli". Kkren-d. Ṛuḥen, alamma ay wwḍen γer temdint-nni
n sselṭan. Kran yiwen n wexxam, qqimen deg-s.
Sselṭan-nni yekker-d ṣ̣ṣ̣baḥ,
yeffeγ-d s azniq. Walan idammen deg leḥwayeğ-is [iceṭṭiḍen-is] deg wudem-is. Nnan-as medden
: "A sselṭan, acu idammen-nni yellan deg-k ?". Yexzer, iwala-ten, yuγal s axxam, yufa ddunit teččuṛ
d idammen. Yexzer akk-a, iwala iriliwen-nni deg ṛebεin yid-sen. Yessared idammen, yeffeγ-d. Inebbeh γef
temdint, yenna-asen : "Bγiγ ad d-asem akk akk γer-i, γer lğameε". Usan-d. Alamma ay d-wwḍen,
yenna-asen : "Tura, nekk urgaγ yiwet n targit, win ay tt-id-yessefran, ad as-fkeγ yelli tameẓyant". Mkul yiwen
d wakk-n ay d-yeqqar. Yenna-asen : "Ula yiwen deg-wen ur d-yezgi deg-s". Yenna-asen : "Tṛuḥem-d akk, akk ? Ur
yeqqim ḥedd [yiwen] maḍi ?". Nnan-as : "Mazal arraw n sselṭan, usan-d ass-agi, ala wid ay yeqqimen". Yenna-asen
: "Laεit-ten". Ṛuḥen, luεan-ten. Usan-d setta, wis sebεa d akli. Nnan-as : "Qqim kečč
ay akli. Maci d kečč ara iqablen sselṭan". Yeqqim Mḥemmed, ur d-yusi ara.
Usan-d setta niḍen.
Alamma ay d-wwḍen, nnan-as : "A sselṭan, acu tebγiḍ γer-neγ ?". Yenna-asen : "Tura nekk urgaγ
yiwet n targit, ur ufiγ ara win ara iyi-tt-yessefrun. Tura, ma tzemrem kenwi ad tt-id-tesefrum". Bdan la ttmeslayen.
Kul ḥedd [yiwen] d wakk-n iheddeṛ. Yenna-asen : "Maci akk-a, ur tt-id-tessefram ara. Ẓret ma ur ixuṣ̣ṣ̣
ḥedd niḍen". Nnan-as : "Yeqqim-d yiwen n wakli d ameẓyan, isem-is Mḥemmed mmi-s n taklit, d gma-tneγ,
ala win ay d-yeqqimen". Yenna-asen : "Awit-t-id ula d netta". Ṛuḥen. Wwin-t-id.
Alamma ay t-id-wwin, yenna-as
: "A sselṭan, acu ay tebγiḍ γer-i imi d-tceyyεeḍ ?". Yenna-as : "A mmi, urgaγ yiwet
n targit, tura ur ufiγ ara win ara iyi-tt-id-yessefrun". Yenna-as : "Ula d nekk urgaγ targit. Tura ad ak-d-ḥkuγ
qbel targit-iw nekk. Imir, teẓreḍ ma akk-a ay turgaḍ ula d kečč". Yenna-as : "Ḥku-d a mmi,
ad ẓreγ". Yenna-as : "Ihi, nekk urgaγ ṛuḥeγ-d nekk d waytma alamma ay d-newweḍ γer
tala n wayt flan. Nensa dinna. Σusseγ nekk, aytma ṭṭsen. Teffeγ-d fell-aneγ Teryel deg tala-nni,
γer-s sebεa n yiqerray. Gezmeγ-as iqerray-is i sebεa. Ṛuḥeγ-d, walaγ times deg yiwen
n umadaγ. Ṛuḥeγ-d, ufiγ-d sin n medden, yiwen ittellem amrar d aberkan, wayeḍ d amellal.
Sseqsaγ-ten, nniγ-asen : "Acu txeddmem akk-a ?". Yiwen yenna-iyi : "D nekk ay yessalayen ass". Wayeḍ yenna-iyi
: "D nekk ay d-yesseγlayen iḍ". Nniγ-asen : "Ihi, sγezfet iḍ-agi. Nekk aql-i ceγleγ.
Aytma ğğiγ-ten ṭṭsen, ugadeγ ad yali wass, ad d-akin, ad dehcen". Nnan-iyi : "Ṛuḥ
γer ccγel-ik, iḍ-agi ad t-nesseγzef alamma tusiḍ-d". Ṛuḥeγ alamma ay wwḍeγ
γer tmes-nni; ufiγ ṛebεin d ariliw. Bnan axxam imir, zlan azger imir, sewwen imir. Nekk lsiγ tacacit,
kecmeγ gar-asen. Akk-n xedmen, xedmeγ yid-sen. Σewqeγ-ten. Nnan-i : "Σeggen-d iman-ik. Nεuhed-ik
ur k-nečči, yerna ad ak-nini aniwer nleḥḥu". Σeyyneγ-d iman-iw. Nnan-i : "La nteddu γer
sselṭan, γur-s sebεa teḥdayin. Ad nṛuḥ ad tent-id-nawi". Nṛuḥ-d, nekk yid-sen.
Alamma ay d-newweḍ γer wexxam n sselṭan, uliγ nekk d amezwaru. La d-ttalin yiwen, yiwen. Win ara d-yalin,
gezmeγ aqerruy-is, alamma ay asen-gezmeγ iqerray-nsen i ṛebεin, ṛuḥeγ γer waytma,
ssekreγ-ten-id. Nṛuh-d d yiberdan-nneγ. Tura d ay-a ay urgaγ nekk. Ma d ta ay d targit-ik ula d kečč
neγ maci akk-a ?".
Yenna-as sselṭan : "Yeεṭi-k ṣ̣ṣ̣aḥḥa a
mmi. Ala kečč ay tt-id-yessefran". Yenna-as : "Tura a mmi, kečč d waytma-k deg sebεa, yessi deg sebεa,
ad awen-tent-fkeγ. Kečč d ameẓyan deg waytma-k, aγ tameẓyant-nni deg yessi".
Wwin-tent-id.
Ṛuḥen-d deg webrid. Alamma ay d-wwḍen γer yiwen n wemkan, yekker-asen fad. Ufan-d yiwen n lbir. Nnan-as
: "Wi ara iṣ̣ubben ad aγ-d-yeččaṛ aman, ad nsew nekni, ad rnun yijedεan-nneγ". Ugin
akk ad ṣ̣ubben. Ugaden. Yekker-d Mḥemmed mmi-s n taklit, yenna-asen : "D nekk ara iṣ̣ubben". Tenna-as
teqcict-nni, tameṭṭut-is : "A Mḥemmed, ur ttṣ̣ubbu ara. Ad gezmen fell-ak amrar". Yenna-as :
"Nekk ad ṣ̣ubbeγ. Ad ten-id-ssweγ, am nitni, am tilawin-nsen, am yijedεan-nsen. Ma bγan ad
gezmen fell-i amrar, gezmen-t". Tenna-as : "Ihi, ax-n taxatemt, err-itt deg uḍad-ik. Efk-iyi-d taxatemt-ik, ad tt-rreγ
nekk deg uḍad-iw". Yeṭṭef taxatemt-nni-ines, yuqem-itt deg uḍad-is. Tin-is netta, yefka-as-tt i nettat.
Iṛuḥ, iṣ̣ubb. Yeččuṛ-asen-d aman. Swan nitni, tilawin-nsen d yijedεan-nsen,
swan akk, akk. Netta, gezmen fell-as amrar.
Tweṣ̣ṣ̣a-t teqcict-nni, tenna-as : "Ma tṣ̣ebḥeḍ-d
γef yikerri amellal, ad k-yessuffeγ γer ddunit, ma tṣ̣ebḥeḍ-d γef uberkan, ad k-iḍegger
γer ddaw n tmurt".
Akk-n yeγli, yeṣ̣beḥ-d γef uberkan. Iḍegger-it γer ddaw
tmurt. Yewwi-t γer yiwen n wexxam. Yufa yiwet n temγart γur-s ulli d tγeḍḍen. Yufa-tt tteẓẓeg
ayefki d aberkan, εlaxaṭer ulli-nni-ines d tγeḍḍen-nni tetten ala tirgin. Yenna-as : "A yemma
tamγart, acuγer akk-a ayefki d aberkan ?". Tenna-as : "A mmi, ur sεiγ ara anda ara kseγ. Tamurt-a
kra n wuccen, kra n yewtal, kul ḥedd [yiwen] s wayla-s. Ur iyi-ttağğan ara ad kseγ deg wayla-nsen". Yenna-asen
: "D nekk ara yeksen. Tura tiniḍ-as i walbaεḍ deg-sen ad inebbeh fell-i". Iṛuḥ la ikess. Win
ara d-inebbhen fell-as, ad t-yenγ alamma ur d-yeğği ula d yiwen deg-sen.
Yiwwas, yesla-asen i yefrax
ttmeslayen. Yanna-as yiwen i wayeḍ : "Mḥemmed mmi-s n taklit, lemmer ad yezlu ikerri, ad d-rsen yigudar, ad ččen,
ad t-yawi yiwen γer lberr". Yesla-asen akk-a ṣṣbaḥ. Tameddit-nni, yenna-as i temγart : "A yemma
tamγart, nekk tura aql-iyi ad ṛuḥeγ. Xilla [aṭas] ay-a ay qqimeγ dagi". Tenna-as : "Aniwer,
a mmi, ara tṛuḥeḍ ? Qqim, ata kulci inek. Ad tṛuḥeḍ, ad iyi-teğğeḍ weḥd-i
[i yiman-iw] ! Nekk tura uγeγ yid-k tanumi". Yenna-as : "Nekk ad ṛuḥeγ. Efk-iyi yiwen n yikerri".
Tenna-as : "Atni γer-k, a mmi, wakraren. Awi-ten akk, maci ala yiwen". Yenna-as : "Nekk ḥwağeγ yiwen".
Tenna-as : "Fren ikerri ay ak-yehwan".
Yewwi-d yiwen n yikerri yellan d lεali. Yezla-t rrif n lebḥeṛ.
Yers-d yigider, netta d warraw-is. Ččan alamma ay ččan, swan aman. Yenna-asen baba-tsen : "Win ay aγ-ixedmen
akk-a, lemmer ad d-iεeyyen iman-is, ma yebγa, ula γer lberr ad t-ssuffγeγ". Yenṭeq-d netta,
yenna-as : "D nekk. Ssuffeγ-iyi γer lberr ihi, ma ara iyi-tessuffγeḍ". Yenna-as : "Awi-iyi-d sebεa
n tecriḥin n weksum, taliḍ-d γef weεrur-iw. Mi ak-nniγ : "Efk-iyi-d tacriḥt, tefkeḍ-iyi-tt-id".
Yewwi-d sebεa n tecriḥin.
Yerfed-it-id. Ṛuḥen-d. Mi as-yenna : "Efk-iyi-d tacriḥt", yefk-as-tt.
Alamma ay d-teqqim tis sebεa, teγli-as γer lebḥeṛ. Iwet γer tmeccact-is s lmus, yegzem-as-d
tacriḥt, yefka-as-tt. Yenna-as : "A Mḥemmed, tacriḥt-agi mellḥet". Yenna-as : "D aman n lebḥeṛ
ay tt-id-iḥekmen". Alamma ay t-id-yessuffeγ γer lberr, iserreḥ-as, iwala-t la yettrejdil. Yenna-as :
"Acu ay k-yuγen a Mḥemmed, imi tettrejdileḍ akk-nni ?". Yenna-as : "A wlidi, tacriḥt-nni taneggarut
teγli-iyi γer lebḥeṛ. Gezmeγ-d deg tmeccact-iw". Yenna-as yigider-nni : "Welleh, lemmer maci d
lxir ay txedmeḍ deg-i, ar k-rreγ γer wansi ay d-tekkiḍ. Amek armi ara d-tgezmeḍ deg tmeccact-ik
? I tiniḍ-iyi "teγli-iyi γer lebḥeṛ", ad k-id-ssuffγeγ ncalleh s lğehd n Ṛebbi".
Yenna-as Mḥemmed : "A wlidi, ugadeγ ad tnezfeḍ". Yenna-as : "Amek, sebεa n lebḥuṛ εeddaγ-d
fell-asen, yiwen, ad nezfeγ deg-s ?". Yenna-as : "Tura iεedda". Yemεuqq-d yigider-nni, yerra-d tacriḥt-nni,
yerra-as-tt s amkan-is, tuγal [teqqel] γer wakk-n tella. Winna iṛuḥ-d. Igider-nni iṛuḥ,
yuγal s amkan-is. Netta iṛuḥ-d, yeṣ̣beḥ-d γer yiwen n wemγar ur yesεi ḥedd
[yiwen]. Yeqqim γer-s.
Baba-s n Mḥemmed, imi d-wwḍen wiyiḍ, yenna-asen : "Anda yella mmi-s
n taklit ?". Nnan-as : "Mmi-s n taklit yeγli deg lbir. Tura nekni aql-aγ newwi-d tilawin. Ma d netta, yemmut". Nitni,
mkul yiwen yeqqar-as i teqcict-nni : "D nekk ara kem-yaγen". Nettat tugi. Mkul yiwen yeqqar-as i baba-tsen : "D nekk
ay tt-id-yewwin, taqcict-agi". Nettat tenn-asen : "Ula d yiwen ur iyi-d-yewwi. Ay iyi-d-yewwin d Mḥemmed. Netta, tgezmem
fell-as amrar. Tnaḥem deg-s". Yekker baba-tsen, yenna-as i teqcict-nni : "D nekk, a yelli, ara kem-yaγen". Tenna-as
: "Nekk, argaz n ddunit ur t-ttaγeγ ara, ḥaca [ala] ma yeffeγ-d Mḥemmed mmi-s n taklit γer
ddunit. Ma ur d-yeffiγ ara, ad qqimeγ akk-a, ur jewwğeγ ara".
Alamma ay tt-yeḥṛes,
tenna deg wul-is : "Nekk ad t-jeṛṛbeγ, ad cerḍeγ snat n leḥwayeğ. Ma yewwi-tent-id,
ḥṣ̣iγ Mḥemmed yeffeγ-d γer ddunit".
Tenna-as i sselṭan : "Ma tebγiḍ
ad k-aγeγ, awi-iyi-d aqefḍan ur txaḍ tsegnit". Nettat tenna deg wul-is : "Yak leḥwayeğ-a
ulac win ara tent-ixedmen, ḥaca taxatemt-iw yellan γer Mḥemmed ay as-fkiγ γer lbir ay deg ay t-ḍeggren
waytma-s ?".
Deg mi ay as-tenna i sselṭan "awi-iyi-d aqefḍan-nni", iṛuḥ γer Wuwday, yenna-as
: "Ad iyi-txedmeḍ aqefḍan ur txaḍ tsegnit". Yeqqim Wuwday-nni la yettru.
Amγar-nni ay γer
yella Mḥemmed yeqreb-it Wuwday-nni. Yesla-as Mḥemmed mmi-s n taklit mi yettru. Yessawel-as, yenna-as : "Acu ay
k-yuγen ay Uwday imi tettruḍ ?". Yenna-as : "D sselṭan ay iyi-yennan xdem-iyi-d aqefḍan ur txaḍ
tsegnit. Tecreḍ-it-id yiwet n teqcict, tenna-as awi-iyi-t-id akk-n ad akk-aγeγ, ma ulac, ur k-ttaγeγ
ara". Yenna-as Mḥemmed : "Ṛuḥ γer-s, ini-as : awi-iyi-d lemlef, rnu tiniḍ-as : anwa ass ay deg
ara t-teḥwiğeḍ".
Iṛuḥ γer-s Wuwday, yenna-as : "A sselṭan, awi-iyi-d lemlef,
tiniḍ-iyi i melmi ara t-tebγuḍ". Yenna-as sselṭan : "Yumayen, ass n wis telt yyam, ad yili yewjed".
Iṛuḥ-d Wuwday, yewwi-d lemlef.
Alamma ay d-yewweḍ γer Mḥemmed, yenna-as : "Yenna-iyi-d
: ass n wis telt yyam, ad t-id-tawiḍ". Yenna-as Mḥemmed : "D ay-n isehlen". La igezzem deg lemlef, yettḍeggir.
Alamma ay d ass n wis telt yyam, yebren taxatem-nni ay as-tefka tmeṭṭut-is. Yeγli-d uqefḍan. Yewwi-as-t
Wuwday i sselṭan, yenna-as : "Ha-ta-n uqefḍan ay iyi-d-tenniḍ". Yewwi-t sselṭan teqcict-nni, yenna-as
: "Ha-ta uqefḍan. Yak tura ad iyi-taγeḍ ?". Tenna-as : "Rnu-iyi-d tayaziḍt n ddheb, arraw-is n ddheb,
ad leqqḍen lğuheṛ deg ssniwa n lfeṭṭa, imir ad k-aγeγ". Iṛuḥ-d γer
useyyaγ, yenna-as : "Ad iyi-txedmeḍ tayaziḍt n ddheb, ifax-is n ddheb, ad leqqḍen lğuheṛ
deg ssniwa n lfeṭṭa".
La yettru useyyaγ-nni. Iṛuḥ-d γer Wuwday-nni ixedmen aqefḍan,
yenna-as : "Wi ak-ixedmen aqefḍan ? Ssken-iyi-t, ad iyi-yexdem ula d nekk tayaziḍt-agi".
Iṛuḥ-d
Wuwday γer Mḥemmed, yenna-as : "A wlidi, ata way as-yenna i useyyaγ. Tura, aseyyaγ yewweḍ-d γer-i,
yenna-iyi ssken-iyi win ay ak-ixedmen aqefḍan". Nekk ugiγ. Tura, ma t-id-awiγ γer-k neγ ad as-iniγ
d nekk ay t-id-ixedmen, ad iṛuḥ d webrid-is". Yenna-as Mḥemmed : "Ini-as ad d-yas γer-i". Iṛuḥ
Wuwday γer useyyaγ, yewwi-t-id. Yenna-as Mḥemmed i useyyaγ : "Ṛuḥ γer-s, ini-as : a
sselṭan, efk-iyi-d ddheb, tiniḍ-iyi-d i melmi ara tt-tebγuḍ". Yenna-as : "Yiwwas, ass n wis yumayen
ad tili tewjed, ma ulac, ad gezmeγ aqerruy-ik".
Iṛuḥ-d, yewwi-d ddheb. Alamma ay d-yewweḍ γer
Mḥemmed, yenna-as akk-n ay as-d-yenna. Yeṭṭef Mḥemmed la igezzem deg ddheb, yettḍeggir. Alamma
ay d azekka-nni, yebren taxatem, teγli-d tyaziḍt d yefrax-is, leqqḍen lğuheṛ deg ssniwa n lfeṭṭa.
Yewwi-as-tt useyyaγ, yenna-as : "A ssi sselṭan, attaya tyaziḍt ay iyi-d-tenniḍ". Yewwi-tt sselṭan
i teqcict-nni, yenna-as : "Yak tura ad iyi-taγeḍ ? Leḥwayeğ-ènni ay iyi-d-tenniḍ aql-iyi wwiγ-tent-id
i snat, am uqefḍan, am tyaziḍt". Tenna-as : "Tura ad k-aγeγ". Yekker, yuqem tameγra.
Alamma
ay d tameddit, yekker-d wemγar-nni ay γer yettili Mḥemmed, yenna-as : "A Mḥemmed, a mmi, nekk ad ṛuḥeγ
γer tmeγra n sselṭan". Yenna-as Mḥemmed : "Qqim a baba amγar, kečč ur tezmireḍ
ara. Albaεḍ ad k-idegger, ad ak-ikemmel taṛwiḥt". Yenna-as : "Ad ṛuḥeγ kan". Iṛuḥ
wemγar-nni.
Akk-n yeffeγ, Mḥemmed yebren taxatemt, yenna-as : "A Ṛebbi, bγiγ ajedεun
d azegzaw, llebsa d tazegzawt, ajedεun imezwura d lebraq, ineggura d aḍu". Yeγli-as-d. Yerkeb fell-as, yeffeγ,
iṛuḥ.
Alamma ay yewweḍ, yufa ffγen-d akk medden. Bḍan yemnayen, tturaren. Netta yeγli-d
gar-asen. Wa yerẓa-t, wa yesderγel-it, wa yenγa-t. Yessexṣ̣er-asen urar, iṛuḥ-d. Yufa-d
amγar-nni, idegger-it, yesseγli-t γer ssaqya, yeğğa-t, iṛuḥ-d s axxam.
Taqcict-nni
txezzer-d deg-s, teḥṣ̣a d netta ay ixedmen anect-nni, tefṛeḥ.
Yewweḍ-d wemγar-nni,
yufa-t-id deg wexxam. La yettnazaε wemγar-nni. Yenna-as Mḥemmed : "Acu ay k-yuγen ?". Yenna-as : "Uuh
! A mmi, yeffeγ-d fell-aneγ yiwen, ur yeğği ula d ḥetta [yiwen] seg lγaci. Ula d nekk idegger-iyi".
Yenna-as : "Yak nniγ-ak qqim, kečč ur tezmireḍ ara, alamma ay tṛuḥeḍ, ur iyi-terziḍ
ara". Yenna-as wemγar-nni : "A mmi, ur neḥṣ̣i ara s wanect-a".
Alamma ay d azekka-nni, εawden
diγen tameγra. Yenna-as wemγar : "Ad ṛuḥeγ diγen ass-a". Yenna-as Mḥemmed : "Ur
tecεifeḍ ara seg yiḍelli ?". Yenna-as : "Ad ṛuḥeγ, ahat ass-a ulac, ur d-yettuγal ara".
Akk-n yeffeγ, Mḥemmed yebren taxatemt, yenna : "A Ṛebbi, bγiγ llebsa d tamellalt, ajedεun
d amellal, imezwura d lebraq, ineggura d aḍu". Yeγli-d. Yerkeb fell-as, iṛuḥ. Yexdem-asen aγleb
[ugar] n yiḍ-nni iεeddan, ula d amγar-nni idegger-it diγen. Iṛuḥ-d, yewwed-d s axxam, yeqqim.
Ataya wemγar-nni yusa-d, la yettnazaε. Yenna-as : "Acu ay k-yuγen ?". Yenna-as : "A mmi, ass-agi aγleb
[ugar] n yiḍelli !". Yenna-as : "Nekk qqareγ-ak qqim, alamma ay tugiḍ, awer tekkreḍ". Yenna-as : "A
mmi, tεedda".
Alamma d azekka-nni, εawden diγen tameγra. Iṛuḥ, yuγal diγen
wemγar-nni. Mḥemmed yebren taxatemt, yenna-as : "A Ṛebbi, bγiγ llebsa d taberkant, ajedεun
d aberkan, imezwura d lebraq, ineggura d aḍu". Yeγli-d. Yerkeb fell-as, iṛuḥ.
Alamma ay d-yewweḍ,
yufa-ten tturaren. Yekcem gar-asen. Yejbed-d isekkin, yeγli deg-sen. Alamma ay d-yewweḍ γer waytma-s akk d
baba-s, llan qqimen weḥd-sen [i yiman-nsen], yenna-asen : "Ad iyi-tinim anwa yebγan ad yaγ taqcict ay d-yewwi
Mḥemmed mmi-s n taklit". Imir εeqlen-t. Yenna-as baba-s : "A mmi, ula d yiwen ur t-ğğiγ ad tt-yaγ".
Yenna-asen i waytma-s : "Ssiwlet i tilawin-nwen, ad d-asent, ḥwağeγ-tent, γur-o ara mmeslayeγ
yid-sent". Ssawlen-asent, usant-d. Alamma ay d-wwḍent, yenna-asent : "Awimt-d weltma-tkent". Luεant-tt.
Alamma
ay d-yusa, yenna-as : "Tεeqleḍ-iyi neγ ur iyi-teεqileḍ ara ?". Tenna-as : "Σeqleγ-k seldiḍelli,
maci alamma ay d ass-a. Γur-i lexbar yis-k tettγeḍ-d γer ddunit asmi ay d-yewwi baba-k aqefḍan
d tyaziḍt d wid ay iyi-yesfehmen ḥṣ̣iγ teffγeḍ-d, telliḍ deg ddunit".
Yenna-asen
i waytma-s : "Init-iyi amek tεuddem deg wulawen-nwen ? Tura, kenwi d irgazen, ad gezmeγ iqerray-nwen sdat n tilawin-nwen".
Nitenti xezzrent. Nnan-as tilawin-nni : "A sidi, nekkenti ur neḍlim ara. Ay iḍelmen d aytma-k akk d baba-k,
seg wasmi ay d-newweḍ, ula d netta yeqqar-as i teqcict-agi-nneγ "ad kem-aγeγ", netta ur t-teqbil ara".
Yenγa gma-s ameqran, yerna yid-s yiwen d wid ay igezmen amrar, yerna yenγa baba-s. Yeğğa ṛebεa
niḍen εlaxaṭer wid-nni mi gezmen fell-as amrar, nnan-asen : "Ur gezzmet ara amrar γef Mḥemmed,
d netta ara aγ-yettselliken deg mkul lḥağa".
Yeqqim Mḥemmed, yuqem tameγra, yuγ tameṭṭut-is.
Yeqqim deg wexxam-is netta d waytma-s deg ṛebεa.
Seg "Légendes et contes merveilleux de la Grande Kabylie",
sγur Auguste Mouliéras, 1893, Publication de l'Ecole des Lettres d'Alger
|
