Tamazight d yiwet negh d at'as n tutlayin ?

D tidet, txuṣ̣ṣ̣ teywalt (communication) gar tmiwa-nneγ yemgerraden (yemxallafen) yernu ddewla ur as-tebdid ara i tutlayt, ur tt-tesseqεed, ur tt-terri d tizeγt (standard) akk-n ad teqqel am nettat, am tutlayin timeqranin niḍen, dγa d ay-a ay yeğğan tutlayt-nneγ ad tebḍu d tintalyin (dialectes), yernu ula d tintalyin-nni bḍant d timeslayin (parlers), yal yiwet ttmeslayen-tt deg tama d tamecṭuḥt, d acu kan, akk imesnilsiyen (linguistes) ay yeγran γef temsalt-a nnan-d dakk-n tamaziγt teddukkel deg tseddast-is (syntaxe). Ilugan n tjeṛṛumt-is (grammaire) d yiwen-nsen.

Nekk lule γ deg yiwet n taddart deg tlemmast n Tmurt n Leqbayel, deg Wayt Weγlis (deg twilayt n Bgayet). Kkreγ-d deg yiwet n tama ay deg llant tmeslayin (parlers) yemxallafen n teqbaylit. Timeslayin-a yella gar-asent tikkwal lxilaf d ameqran deg wenṭaq, yernu ttemxallafent tikkwal ula deg kra n wawalen. Dγa, deg tama-nneγ neqqar"ayyur", maca tella yiwet n tama tebεed fell-aneγ s kra kan n yikulumitren, qqaren-d dinna [aggur]. "Axxam n wergaz" llan wid ay t-id-ineṭṭqen deg tama-nneγ [axxam bbwergaz] neγ diγ [axxam ggwergaz], "aḍar" neṭṭqen-t-id, deg tudrin n wedrar-nni ay aγ-d-iqublen [aṭar]. Asmi ay nella d imecṭuḥen, nella nettaḍsa γef wemxallaf-agi, maca werğin nxemmem dakk-n lğiran-nneγ ttmeslayen tutlayt niḍen skud nella nettemsefham s tefses wagar-aneγ, γas ma yella tikkwal, nella nesteqsay imawlan-nneγ d acu ay d lmeεna n kra n wawalen ay werğin nesli deg taddart-nneγ.

Deg Ldzayer, mlaleγ-d d yemdanen ay d-yekkan seg tudrin yemgerraden seg tmiwa-nni umi neqqar [Tamurt n Leqbayel] "Tameqrant" d "Tmecṭuḥt". Ay-a yeğğa-iyi ad qqleγ ad fehhmeγ akk timeslayin n Leqbayel, ama d tid n ccerq neγ d tid n lγerb n Tmurt n Leqbayel, γas ma yella tikkwal, yella yewεeṛ fell-i ad εeqleγ kra n wawalen, nekk ssneγ-ten seg temẓi, maca imi ay d-ttwanṭaqen akk-n niḍen deg tmiwa niḍen ur lliγ ara zemreγ ad ten-fehmeγ d umatu. D acu kan, mi ara yaγ wemdan tanumi d yeγdebba (accents) yemxallafen d way-n ay d-ittgen lxilaf gar tmeslayin n Leqbayel, ad yeqqel ad ifehhem taqbaylit, ay akk-n yebγu tili. Sakk-in, mlaleγ-d d kra n yelmeẓyen seg Yicenwiyen, seg Wewras akk d tmurt n Yemẓabiyen u ssawḍeγ ad fehmeγ ay-n ay deg tettemcabi d way-n ay deg temxallaf teqbaylit d tcenwit, tacawit akk d temẓabit. Greγ tamawt dakk-n d ay-n ay deg mxallafent tmeslayin tiqbayliyin yembaεaden ay deg temxallaf diγ teqbaylit d tentalyin (dialectes) n tmiwa niḍen. S way-a, [j] n "ijider" ay d-lemdeγ seg yimawlan-iw neṭṭqen-t-id am nekni deg tentalyin niḍen, deg lweqt ay deg deg Tmurt n Leqbayel, amur ameqran deg medden neṭṭqen-d [igider] (s [g] azenzaγ, nezmer ad d-nini dakk-n yeqreb γer [y]). "Igenni" qqaren-t-id "ajenna" s tentalyin niḍen, "tiṭṭawin" d asget (pluriel) n "tiṭ", ma d awal "ijet" (yiwet) ay d-qqaren deg tentalyin-a, yettwassen ula deg Tmurt n Leqbayel, imi ula deg Wayt Xelfun (deg twilayt n Bumerdas) qqaren-t-id, deg lweqt ay deg amur ameqran deg Leqbayel qqaren-d "yiwet".

S ttejṛiba-agi-inu tamecṭuḥt, ay gan aṭas n yemdanen niḍen n lğil-inu, zemreγ ad d-iniγ, mebla akukru, dakk-n lemmer ad ṭṭuqqten yiberdan n teywalt (communication), am ṛṛadyu, tilibizyu d internet, u ad d-nessebded tirawt tizeγt (écriture standard) ara aγ-yeğğen ad nettaru akk s yiwen webrid, s yiwen wudem, awalen ay deg nemxallaf deg wenṭaq, nezmer, mebla ccek, ad nessiweḍ ad nettemsefham mebla uguren s tutlayt-nneγ. Ambaddel-a ad yeğğ yal Amaziγ ad yaγ tanumi d wamek ay d-neṭṭqen anda niḍen, yernu amgerrad (lxilaf) deg wawalen ad neqqel ad t-nettwali d timmeṛkantit i tutlayt, maci d ay-n ara d-igen ugur akk-n ad nemsefham wagar-aneγ.

Ihi, a win yufan ad neğğ ifukal (arguments) imsiriyen (racistes) n wid ay aγ yesteεmṛen zik-nni, ifukal-nni ay d-yeqqaren dakk-n nekni s Yimaziγen, tella deg yidammen-nneγ, ur nezmir ara ad d-neg agdud yeddukklen. A win yufan, ad neqdec akk-n ad nessugget (ad nesṭuqqet) inermisen (contacts) gar tmiwa-nneγ, yernu dindin kan ad d-nerr s lexbar dakk-n tutlayt-nneγ ur tebḍi ara d tintalyin ugar n tutlayin niḍen n yemdanen. Bitt, nezmer ad nnadi ad yili wemgerrad (lxilaf) gar tentalyin i lmend n ccbaḥa n tmesliwt n yeγdebba-nneγ (accents), akk-n yella lḥal deg waṭas n tutlayin niḍen yettwassnen.

Boualem Aourane
Montréal, 11 Yebrir 2005