Tamsalt takatalanit deg Temzikkent n Frankfurt
11 Tubeṛ 2007
Aṭas seg yimura yettarun s tespenyulit ay iγunzan (boycotter) timzikkent (foire) n wedlis tis 59 n Frankfurt
(deg Lalman), yerna aseggas-a, tamsalt takatalanit d nettat ay d-yerran lwelha n medden deg temzikkent n useggas-a, imi ay
d-texleq deg-s uguren.
Timzikkent (foire) n Frankfurt d nettat ay d timzikkent n wedlis (taktabt) tameqrant akk deg ddunit, maca aseggas-a,
kra kan n tsaεtin uqbel ma teldi, wid ay tt-id-igan sḥassfen imi ay γaben deg-s aṭas n yimeskaren (auteurs)
ispenyuliyen, yerna aseggas-a, d Katalunya ay d tinebgit n yiseγ deg temzikkent-a.
”Qrib akk imeskaren (auteurs) yettarun s tespenyulit ay d-yettwaεerḍen ur ttekkan ara, ula d wid yellan
d Ikatalaniyen” ay d-yenna, ass n ttlata [9 Tubeṛ], unemhal n temzikkent (directeur de la foire), Jürgen Boos,
u yerna-d belli ”ssebba n way-a netta d taγelnaẓri (nationalisme) akk ed umennuγ ay d-yettilin deg Spenyul
gar medden n tmiwa yemxallafen akk ed zzux s yiman”.
Boos yessegra-d belli yesḥassef ”imi idles akatalani ur yettekka ara s wakk tanḍa-ines (diversité)
deg temzikkent-a”. [Meḥsub s wid yettarun s tespenyulit akk ed wid yettarun s tkatalanit].
”Nugad temzikkent-a ad d-teglu s kra n diri sya ar sdat” ay aγ-d-yerna, u yenna-d belli asmi ay xtaren
ad tili Katalunya d tinebgit n yiseγ (yili Katalunya d yiwet seg tmiwa iḥekmen iman-is deg Spenyul), yekker umennuγ
”d ameqran yerna nekcem deg tsertit (politique)”, u werjin yekker umennuγ am wa deg umezruy (ttarix) n temzikkent-a
(foire) seg wasmi ay d-tennulfa.
I lmend n tullya n temzikkent-a (foire), ameskar (auteur) akatalani Quim Monzo yenna-d yiwen n yinaw (discours) s wawal
qessḥen maca daγen s taḍsa, u iwet-d deg-s deg Yikatalaniyen ara yettmeslayen akk-n ur kksen lḥeqq
i Yikatalaniyen niḍen yettarun s tespenyulit akk-n ad ttekkin deg temzikkent-a. ”Ilsawen akk ed yedles (littérature)
ur yessefk ara ad nḍerrent seg tsertit, d acu kan, nekni aql-aγ nuweḍ γer tegnit-nni” ay d-yenna,
u yerna-d belli yewhem mi d-yufa belli timzikkent teεreḍ-d ”idles yesεan tasekla (littérature) yeftutsen,
tebḍa γef wacḥal n tmura ay deg ur telli ula deg yiwet deg-sent d iles unṣ̣ib (officiel) s tidet”.
Asudu (Institut) n Ramon Llull ay d-yelhan d wesnerni n yedles akatalani deg ddunit, yeεzem ad yessuffeγ
imura ikatalaniyen yettarun s tespenyulit seg terbaεt n Yikatalaniyen ara yettekkin deg temzikkent-a (foire), d acu kan,
deg wayyur n Yunyu iεeddan, asudu-a yeqqel deg wawal-is u yeqbel attekki-nsen, ladγa imi ay t-ttehmen belli d imsebḍayen
(séparatistes) ay t-iḥeṛsen akk-n ad yeg ay-a.
Maca amur ameqran deg Yikatalaniyen yettarun s tespenyulit, u gar-asen Carlos Ruiz Zafon (ay d-yuran Tili n waḍu), Javier Cercas (ay d-yuran Iserdasen n Salamine)
akk ed Eduardo Mendoza (ay d-yuran Tamdint n wid izaden [La ville des prodiges]),
ur qbilen ara ad ttekkin imi alama ay ifat lḥal ay d-ttwaεerḍen.
Takatalanit d iles aṛuman (romane), tettwamneε deg yiseggasen n tesnaraft (dictature) n Franco (gar 1939
d 1975), maca ass-a, la tt-ssawalen 13 n yimelyunen n medden, deg Katalunya am wakk-n ay tt-ssawalen deg tmiwa niḍen
am tegzirin n Baleares, tama n Valencia (deg Spenyul), deg tmurt n Andorre [gar Spenyul d Fṛansa] akk ed yiwet n tama
deg wenẓul (sud) n Fṛansa.
”Mendoza yenna-d belli netta yettwassen, idlisen-is ttnuzun mliḥ yerna d nnuba n yimeddukal-is akk en ad
d-rren γer-sen medden n ddunit lwelha-nsen”, ay aγ-d-yessefhem Mass Boos.
Ma d Zafon akk ed Cercas, nnan-d belli ur ttekkan ara imi ay ugin yiγelnaẓriyen (nationalistes) ikatalaniyen
ad steεṛfen s tespenyulit d iles yellan d aḥric seg yedles n Katalunya, am yiles akatalani. ”I wumi
ccwal-agi akk ?” ay d-tesseqsa Petra Roth, tamγiwant (maire) n temdint n Frankfurt, mi akk-n ldin timzikkent, yerna
tullya n temzikkent-a yeḥdeṛ deg-s ula d aselway (ṛṛayes) n ”Generalitat n Katalunya”
(amni [parlement] akatalani), Mass José Montilla Aguilera.
Petra Roth terna-d belli ma yella aseggas-a d ”Katalunya ay d tinebgit n yiseγ” deg ”tmaneγt
n wedlis” (capitale du livre), ay-a ur yebγi ara ad d-yini belli ”d yiwet seg tmiwa n Spenyul ay d-yettwaεerḍen,
wanag d tasekla-ines (littérature)”.
Askasi-a (débat) γef tnettit (identité) n tmiwa akk ed yedles yella-d deg tegnit ay deg la trennu la tettcewwil
temsalt n Yikatalaniyen ed Yibaskiyen deg Spenyul, nnig way-a, agellid n Spenyul, Juan Carlos, yessefk fell-as ad iqabel wid
la yessutturen ad tebḍu Katalunya akk ed Spenyul.
Katalunya d nettat ay d amutur n tdamsa (économie) n Spenyul, yerna d nettat ay d ul n ussuffeγ n yedlisen (tektabin)
deg Spenyul. Dγa 150 n yimeskaren (auteurs) ay yettekkan s yisem n Katalunya deg temzikkent-a (foire) wuγur ara
d-asen azal n 7300 n yemttekkiyen seg 110 n tmura akk-n ad ssenzen idlisen-nsen.
Wid ay d-igan timzikkent-a (foire) la ttṛajun ad d-rzun fell-as azal n 300.000 n medden sya ar ass n lḥedd
(14 Tubeṛ).
Asselmed n tira d tγuri i wid ur neγri ara, adiwenni (dialogue) gar yidelsan akk ed tlelli n wawal d kra
seg temsal timeqranin ay d-xtaren i temzikkent-a tis 59 n Frankfurt.
Seg Dépêche de Kabylie, Lexmis 11 Tubeṛ 2007 – Uṭṭun
1632
Tasuqilt sγur Omar Mouffok
