Tasmizwert* n Yimaziγen n Fṛansa ad teg ass aγelnaw amezwaru n Yiles Amaziγ deg 27 Tubeṛ d-itteddun

22 Ctembeṛ 2007

*Coordination

Tiddukliwin tifṛensisin-timaziγin rẓant-d asalu imi ay d-snulfant ass aγelnaw amezwaru n yiles amaziγ.

Ma yella nebγa ad nerr iles amaziγ d yiwen seg yilsawen n Fṛansa, ur d-iḍerru ara alama tessutter-it-id tmetti (société). Γef way-a, γas ma yella Tasmizwert n Yimaziγen n Fṛansa la tessuttur seg tsuda tidelsanin (institutions culturelles) akk ed usselmed akk-n ad skecmen asselmed n tmaziγt s tidet γer uγerbaz (llakul), maca la nqeddec daγen s lebγi meqqren akk-n ad d-nessaki tiwaculin, ibalmuden akk ed yinelmaden γef wazal yesεa yiles amaziγ.

Mi ara nεeddi seg wawal γer leqdic n tidet, yessefk ad nili nettkel belli asmi ara yebdu usselmed n tmaziγt deg tesnawiyin (lycées), iles amaziγ ad yaf wid ara t-yeγren, meḥsub, inelmaden ifṛensisen-imaziγen ad ssiggzen (ad mmeṛkin) iman-nsen akk-n ad sεeddin tanga (matière) n tmaziγt deg lbak.

Seg 1995, azal n 2000 n yinelmaden ara yesεeddayen akayad (examen) n tmaziγt yuran deg lbak, yal aseggas. Ihi yessefk ad neqqim kan deg wanect-a neγ ad neεreḍ ad d-nernu wiyaḍ, am wakk-n yessefk ad nesnerni taγara (qualité) n usselmed n tmaziγt, u ay-a ur d-yettili ara alama llan wugar n medden ara t-id-yessuttren.

Tasmizwert (Coordination) n Yimaziγen n Fṛansa tfaq i temsalt-a u teεzem ad d-tetteg, nettat ed tiddukliwin yettekkan deg uẓeḍḍa-ines (réseau) yiwet n tedyant ara d-itteqqlen yal aseggas : ta, d ass aγelnaw n yiles amaziγ. I lmend n way-a, yal tiddukla yettekkan deg uẓeḍḍa yessefk ad d-teg ay-n ay yes ara d-tqeddem i medden iles iles amaziγ u ad t-tesnerni :

Isaragen (conférences), tisgilin n ṛṛadyu

Timzikkniyin (expositions)

Isaragen n weskasi (conférences-débats)

Iḥuna (ateliers) n wurar akk ed tmussni n tira n tfinaγ

Wi d kra seg leqdicat ara yettwagan deg temdinin timeqranin n Fṛansa deg wass n ssebt, 27 Tubeṛ 2007, yerna iswi n leqdicat-a netta d assaki n wanect umi nezmer n yinelmaden n tesnawit (lycée) akk-n ad ssiggzen (ad mmeṛkin) iman-nsen γer ukayad (examen) n yiles amaziγ, mi ara ccaṛ tawriqt ay deg ara xtiren ay-n ara sεeddin. Nnig way-a, nebγa ad neg ifadden i wakk Imaziγen n Fṛansa akk-n ad qqlen γer yiles-nsen, iles n yimawlan-nsen yellan d yiwen seg yilsawen iqburen (iqdimen) akk ay ssawalen medden.

D tikkelt tamezwarut ay deg ara neg ay-a yerna neḥwaj yal yiwen deg-wen ad d-ittekki akk-n ad nesserbeḥ talemmiẓt-a (occasion). Akk lecγal ay tebγam ad ten-txedmem zemren ad d-rsen u ad asen-yettunefk wazal deg udeg n CBF : www.cbf.fr

Assider n yiles amaziγ akk-n ad yili d yiwen seg yilsawen n Fṛansa d tamsalt ay aγ-yerzan akk.

Sγur CBF

Tasuqilt sγur Omar Mouffok

Taγbalut (source) : http://www.cbf.fr/article_leger.php3?id_article=843

Qqel γer usebter n umager