Tiririt n wazal i yemsiweḍ n waman n Saldae (Bgayet)

Deg tezwara n useggas n 2007, tiddukla Gemihab n tesdawit n Bgayet akk d Wammas Aγelnaw n Unadi Azarmezray, Asnemdan d Umezray (Centre National de Recherche Préhistoriquen Anthropologique et historique) bdan amεiwen-nsen akk d yiduba (autorités) n Bgayet d Tuja i lmend n unadi γef umezruy d ttekniyin (techniques) ay yes yettwabna yemsiweḍ n waman n Tuja, deg tallit n Ṛṛuman. Imsiweḍ-a (aqueduc) yebda-d deg tama n Tuja u yebεed s 25 n yikilumitren γef temdint n Bgayet.

Anadi-a iḥuza-d inurar yemgerraden yerna wid ara t-igen bγan ad as-d-rren azal-is i yemsiweḍ n waman n Saldae (isem n Bgayet deg tallit n Ṛṛuman). Lbenyan-a ay yettwaxedmen akk-n ad yessiweḍ aman γer temdint n Bgayet d yiwen seg lbenyanat imeqranen akk n tallit n Ṛṛuman deg twilayt n Bgayet.

Imsiweḍ n waman (aqueduc) n Saldae γezzif 25 n yikilumtiren yerna d amkan ay ssnen yimesnadrizen (archéologues) u zgan rezzun fell-as, ma d agdud, mazal ur t-yessin ara mliḥ. Amkan-a ijebbed-d lwelha ladγa imi wid ay t-yebnan sqedcen tamussni d tamaynut d deg tallit-nsen akk-n ad t-bnun, yerna yesεa daγen azal deg umezruy, imi ay d-ufan deg yemsiweḍ-a aṭas n tira ay yettwaneqcen γef yeẓra-ines u d tid d-yettafken aṭas n yisalan γef Ṛṛuman yellan ddren deg tama-a.

Tilufa yeqqnen γer tγuzi n terga n yemsiweḍ-a (aqueduc) ttwaḥkant-d deg yiwet n tirawt ay d-ufan deg Taẓult (Lambèze), deg twilayt n Batnet. Tamdint n Saldae (Bgayet n wass-a) d amenkad (Empereur) aṛumani Octavius ay tt-yebnan gar 27 d 26 uqbel n Sidna  Σisa. Sakk-in, deg 137 sdeffir n Sidna  Σisa, Ṛṛuman bnan imsiweḍ-a akk-n ad d-awin aman n tala n Tuja γer temdint n Saldae.

Imsiweḍ-a (aqueduc) yessedda-d aman 25 n yikilumitren u yessezger-iten-id γef yiwet n tama n yidurar alama ay ten-id-yessaweḍ γer temdint; d leqdic iweεṛen ay mazal yessewhem imassanen ar ass-a. Nnig way-a, leqdic-a gan deg-s wid ay t-yebnan tiγawsiwin d timaynutin yeqqimen deg umezruy, am tqenṭert n Teḥnayin ay γezzifen 300 n lmitrat u tettwabna akk-n ad afen waman amkan imalen ay deg ara aḍren u ad zegren arettux (dépression) n Ḥnayet (Hanaït). Win ay yesseddan leqdic-a seg mi ay d-yebda alama ay ifuk d yiwen n userdas aqbur (aqdim) n Ṛṛuman, n tlejyunt (légion) tis 3, isem-is Nonius Datus, u d aliberator (d ajenyuṛ n lεeskeṛ). Datus yeγza daγen yiwen n wemruj n 560 n lmitrat deg Yiγil n Leḥbel akk-n ad kemmlen waman abrid-nsen.

Amenzag (géomètre) Eugénie Dewulf ay d-yerran lwelha-ines mliḥ γer leqdic-a, yenna-d, lemmer ad tili Bgayet, deg tallit n Yiḥemmadiyen zedγen-tt 86000 n yimezdaγen, imsiweḍ-a (aqueduc) yella yezmer ad d-yessiweḍ 60 n rritlat n waman i yal yiwen seg yimezdaγen n temdint-a.

Seg tama niḍen, leqdic-a ay bnan Ṛṛuman deg tmurt-nneγ la d-yettheyyi fell-as yiwen n wemnadi adzayri, M. Djermoune, ajdel (thèse) n uduktuṛa deg tesdawit n Siena, deg Ṭ̣ṭalyan, yerna ur ttεeṭṭilen ara ad ldin asalay (musée) deg temdint n Tuja (anda ara ssersen kra n tceqqufin tineṣ̣liyin, tallusin [reproduction], tugniwin akk d yimesliyen) akk-n ad jjen medden ad ssnen amek ay d-yella lebni n yemsiweḍ-a (aqueduc) d wamek ay γzan amruj n Leḥbal (Ifran).

Sγur Nacer Maouche

(La Dépêche de Kabylie, 22 Ctembeṛ 2007, uṭṭun 1615 )

Tasuqilt Omar Mouffok

Taγbalut (source) : http://www.depechedekabylie.com/read.php?id=45628&ed=MTYxNQ==