Tiddukla Tadelsant Imedyazen

Asebter n umager | Imagraden | Isalan | Imenzayen | Taftilt | Imawalen | Idlisen-nnegh | Leqdicat-nnegh | Imazighen | Lmed tamazight | English | Español | Français | Arabe | Anmager | Tabrat n Yimedyazen | Arum-agh-d | Imaslad'en | Tamesgida | Amezruy n Tiddukla

 
Slimane Azem ad d-yeqqel γer Wegni Geγran
 
29/04/2007
Slimane Azem
 
Slimane Azem, ameqran deg yimedyazen-icennayen n Tmurt n Leqbayel, yemmut u yettwamḍel deg lγerba deg 1983. D acu kan, dduṛt-agi ad d-yeqqel γer tmurt-ines.
 
Acḥal n yiseggasen ay ttwamenεent tezlatin n Dda Slimane seg ṛṛadyu d tilibizyu n Ldzayer, d acu kan, medden akk llan ssnen-tent u cennun-tent-id. Ccna-ines ur yelli d tizlatin n zzhu ur nemεin wanag d isefra yesεan lmeεna meγγren, d wid yettḥazen medden deg wul-nsen. Slimane Azem yecna γef lγerba (A Muḥ, a Muḥ ; Aγrib, abeṛṛani ; Afrux Ifirelles), am wakk-n yecna  γef werway ay rwint lumuṛ deg ddunit-a (Terwi, tebberwi, atg.), u yesmekti-d i waṭas n medden terẓeg d lweεṛan n tudert deg lγerba.

Ta
γiwant (commune) n Wegni Geγran tessebded-d Aseqqamu akudan (comité provisoire), u d amγiwan (lmir) ay d imḍebber-ines. Deg 23 Yebrir iεeddan ay yebda useqqamu-a la yeγγaz amkan anda ara yettwabnu usektu (stèle) i Slimane Azem. Amkan-a yuzga-d sdat n tsenbert (place) n taddart yernu d tiddukla ay t-id-ifernen.
 
Slimane Azem ilul-d deg wass n 19 Ctembeṛ 1918 deg Wegni Geγran [adrar n Jeṛjeṛ, Tizi Wezzu], u yemmut deg Moissac, deg Tarn-et-Garonne [Fṛansa] deg wass n 28 Yennayer 1983. Am waṭas n yelmeẓyen n zzman-ines, Slimane Azem yunag γer Fṛansa akk-n ad yeqdec, imi tudert tella tewεeṛ, medden llan ṛwan lḥif deg tmurt. Tizlit-ines tamezwarut, A Muḥ, a Muḥ, teffeγ-d deg yiseggasen n 1940, u yes-s ay d-yebda Slimane yiwen n umecwaṛ γezzifen deg ccna, yeṭṭef 50 n yiseggasen u yecna-d deg-s γef temsal yemgerraden. Deg 1979, Slimane yufa-d lḥal yecna 70 n tezlatin, ugar n wezgen seg-sent ssawalent-d γef ubeddel n tmetti (société). Imi ay tbeddel tudert n tmetti, u mfaraqen medden, banen-d aṭas n yiγeblan d tlufa, Slimane Azem yerra-asent-d akk s lexbar u yessefra fell-asen akk. Daγen, Dda Slimane yettnaγ γef wazalen (valeurs) iqdimen, leεwayed yelhan, u ibedder-d Ṛebbi deg yisefra-ines. Yuγ lḥal, Slimane Azem yezga itteqqel γer ddin deg tezlatin-ines. Maca, seg tama niḍen, Slimane d amedyaz n lγerba u yessefra daγen γef ubeddel ara yettbeddil umaḍal (ddunit). Tizlit-ines Terwi, tebberwi, tesskanay-d dakk-n Slimane yerra-d ddehn-is γer tikli n umaḍal.
 
 
Kra n medden umi dreγlent wallen wten deg Slimane ama asmi ay yedder, ama asmi ay yemmut, u εerḍen ad t-id-weṣ̣fen d « win yellan d abeṛṛani γef tmetti-ines » (société). D acu kan, γas ma yella wigi llan bγan ad t-ttun medden, aṭas seg wid iḥemmlen ccna, ama deg Tmurt n Leqbayel, ama anda niḍen, kemmlen la as-sellen u la ttembaddalen tizlatin-ines, γas s tuffra. Aṭas seg yexṣ̣imen n Slimane Azem ay yuran fell-as akk-n ad d-inin dakk-n ur yettekka ara deg yimenγi γef Ldzayer : yessefk ad d-nesmekti dakk-n Slimane yella d ameγnas deg Ukabar n Wegdud Adzayri (PPA), yernu yettekka, s tγara-ines (à sa façon) deg yimenγi i ussuffeγ n Fṛansa armi d asmi ay yeγreq deg yiγeblan n tudert.
 
Ass-a, Agni Geγran tebγa ad tessemγer yes-s u ad d-terr iγiγden-ines akk-n ad ttwameḍlen deg tmurt-nni ay iḥemmel. D aseqqamu-nni akudan (comité provisoire)  ara d-yelhun d tririt n tfekka (ljetta) n Dda Slimane, yellan d azamul n ccna aqbayli. Aseqqamu-a llan deg-s 12 n yimaslaḍen (membres) yernu d amγiwan (lmir) ay d imḍebber fell-as. D nitni ara d-yesgerwen idrimen, ad sseddun u ad ṣ̣eggmen lecγal n wawway n tfekka n Dda Slimane. Γef leḥsab n useqqamu-a, taγuzi d ussersi n llsas n usektu-nni (stèle), abelleḍ-ines, lebni n uẓekka n Dda Slimane akk d tekla (peintures) ad sqamen azal n 708.701,36 n yidinaṛen (sebεin n yimelyunen), yernu ay-a mebla asebded-nni (statue) ara yersen dinna. D acu kan, γas ma yella leqdicat ad d-sqamen anect-a, aseqqamu iεewwel ad as-yerr tajmilt i Slimane Azem akk-n ay tt-yuklal.
 
D tawacult n Dda Slimane ay iqeblen ad t-id-awin seg lγerba, imi d ay-a ay yella yessaram ama d netta, ama d wid ay t-iḥemmlen. Slimane, γas yejwej, maca ur d-yejji ara arraw-is, yernu ula d tameṭṭut-ines temmut. Ma yella yettwabna usektu-a akk-n iwata (yernu kulci yezmer ad yettwaga), ad nezmer ad as-nettarra tajmilt i Dda Slimane yellan d yiwen seg wid ay as-yeldin abrid i ccna aqbayli akk-n ad d-iban.
 
D acu kan, Slimane Azem ur yemmut ara, wanag isefra-ines d awezγi ad ten-iεeddi zzman.
 
Sγur A. SAID
 
Tasuqilt sγur Omar MOUFFOK
 
L’Expression, 29 Yebrir 2007
 

Tiddukla Tadelsant Imedyazen
Association culturelle Imedyazen
BP 129 Poste Didouche Mourad
16006- Alger - Algérie
Tel. (+213) (0) 64 77 07 37