Make your own free website on Tripod.com

Tiddukla Tadelsant Imedyazen

Asebter n umager | Imagraden | Isalan | Imenzayen | Taftilt | Imawalen | Idlisen-nnegh | Leqdicat-nnegh | Imazighen | Lmed tamazight | English | Español | Français | Arabe | Anmager | Tabrat n Yimedyazen | Arum-agh-d | Imaslad'en | Tamesgida | Amezruy n Tiddukla

 
 
Asmekti n Ccix Aḥeddad deg Sedduq
 
 
Aghdem n Ccix Aheddad
 
Gar wussan n 5 d 8 Yebrir 2007, imezdaγen n Sedduq, Tamurt n Leqbayel d Ldzayer s lekmal-is smektan-d Ccix Aḥeddad, yiwen seg yergazen yennuγen Ifṛensisen akk d lbaṭel-nsen aberkan ay sεeddan γef wegdud-nneγ.
 
Deg wussan-nni n wesmekti, taγiwant (commune) n Sedduq akk d tiddukliwin gant timzikkniyin (expositions) d yemzazwaren (concours). Nnig way-a, aseggas-a ara ifak ahat lemqam-nni ay as-bnan i Ccix Aḥeddad, d amkan wuγur ara d-awin iγsan-is akk-n ad yettwamḍel deg wakal n taddart-is.  Lemqam-a yuzga-d deg wemkan umi qqaren Amdun n Sedduq, d amkan anda ay d-yessegrew (yesnejmeε-d) Ccix Aḥeddad imezdaγen n tama-nni akk-n ad asen-yini ad bdun imenγi d Yefṛensisen.
 
Daγen, aseggas-a, akk-n ad as-rren tajmilt i Ccix Aḥeddad, tessuffeγ-d diγ lbusṭa yiwen n weγḍem (ttamber) s tugna (tteṣ̣wira) n Ccix Aḥeddad. Aγḍem-a amaynut yebda la yettnuzu deg lbusṭa n Sedduq deg wass n 8 Yebrir iεeddan, yernu ad yenz deg wakk lbusṭat n tmurt n Ldzayer.
 
Asmi ay yebda Ccix Aḥeddad imenγi akk d Yefṛensisen yella yagi d amγar ameqran. Γef leḥsab n yiwen seg warraw n warraw-is, Si Ahmed Belhaddad, yettekkan deg wussan-a n wesmekti, Ccix Aḥeddad (isem-is Muḥend Ameẓyan) ilul-d deg tizi n 1790 deg taddart n Sedduq n Ufella.
 
Deg tmeεmeṛt ay d-yessebded baba-s ay yelmed Ccix Aḥeddad Leqran, sakk-in yedda γer zzawya n Cectula (Chechtoula) deg Wayt Σebdeṛṛeḥman, anda ay yeγra ṭṭariqa taṛeḥmanit. Zzawya-nni yella yeṭṭef-itt Ccix Σli ben Σisa, win ay d-ixelfen ccix Ben Σebdeṛṛeḥman, baba-s n ṭṭariqa taṛeḥmanit. Ccix Aḥeddad yella d anelmad yelhan, dγa seg wakk-n yeεjeb imezdaγen n taddart-nni, ssuttren ad yili d netta ay d ccix n tmesgida-nsen (ljameε). Sakk-in, deg 1857, yeqqel Ccix Aḥeddad d netta ay d ccix n ṭṭariqa taṛeḥmanit.
 
Deg 1871, asmi ay tebγa Fṛansa ad tefk leḥkem n Ldzayer i yinehrasen (colons) u ad ternu ad tekkes ugar n wakal i Yidzayriyen, Ccix Lmeqrani (yellan d lbacaγa n Mejjana, deg Lbuṛj Buεṛiṛij), yessker-d ṭṭrad d Yefṛensisen u ddan-d id-s akk leεṛac n tama-nni. Sakk-in, yessaweḍ Ccix Lmeqrani ad iqenneε Ccix Aḥeddad akk-n ad yettekki deg tnekra-a. Asmi ay yeqbel Ccix Aḥeddad, deg ssuq n Sedduq n yimir-n, deg wemkan umi qqaren Amdun n Sedduq, yenna-asen i yimezdaγen n tama-nni : ”Ma yebγa Ṛebbi, ad nḍegger Iṛumyen γer lebḥeṛ akk-n ḍeggreγ aεekkaz-agi », dγa iḍegger aεekkaz-is γer tmurt.
 
Yessaweḍ Ccix Aḥeddad ad d-yessebded igen (armée) n wazal n 20.000 n yergazen, yernu d arraw-is deg sin, Mḥend d Σaziz, ay yessers d imḍebbren γef yigen-a. Ay-a yerna-d afud ameqran i tnekra ay d-yessker Ccix Lmeqrani. S way-a, tanekra-a (révolte) tessaweḍ ad taγ aṭas n tmiwa deg ccerq akk d tlemmast n Ldzayer yernu ttekkan deg-s azal n 250 n leεṛac u fkan-as ixeṣ̣ṣ̣aren imeqran i Fṛansa.
 
D acu kan, deg wass n 5 Magu, yettwanγa Ccix Lmeqrani deg Oued Souflat (qrib γer Σin Bessam, deg Tubiret). Imir-n, bdan la d-ttbanen wuguren gar wid yettekkan deg tnekra-a (révolte), ladγa gar Σaziz, memmi-s n Ccix Aḥeddad akk d Bumezrag, gma-s n Ccix Lmeqrani. Nnig way-a, yekker daγen yimenγi gar yemrabḍen n ṭṭariqa taṛeḥmanit deg Tmurt n Leqbayel, d ay-n ay yejjan iγallen-nni ay d-yessegrew (ay d-yejmeε) Ccix Aḥeddad ur ttkemmilen ara imenγi d Bumezrag.
 
Deg wass n 13 Yulyuz 1871, Ifṛensisen ṭṭfen Ccix Aḥeddad, uwyen-t γer Lbuṛj n Musa (anda yella usalay [musée] n Bgayet ass-a), ḥebsen-t dinna, sakk-in uwyen-t γer Qsenṭina, anda ay t-cuṛεen u ḥekmen-as xemsa n yiseggasen n lḥebs. Ccix Aḥeddad yettwaḥbes deg lḥebs n Lqudyat (El Koudiat) deg Qsenṭina. Yerna kan sin n yiseggasen, sakk-in yemmut. Yella yesεa 83 n yiseggasen deg leεmeṛ-is. Ma d arraw-is, nfan-ten Yefṛensisen γer Kalidunya Tamaynut, akk-n nfan aṭas seg wid ay d-yekkren mgal-nsen.
 
Uqbel ma yemmut, Ccix Aḥeddad iweṣ̣ṣ̣a ad yettwamḍel deg Sedduq n Ufella, anda ay d-ilul, d acu kan, seg wakk-n ggten (ṭṭuqqten) wid ay t-iḥemmlen deg Qsenṭina, meḍlen-t deg temdint-a. Deg 2007, yessutter Si Ahmed Belhaddad d tγiwant (commune) n Sedduq seg tγiwant n Qsenṭina akk-n ad d-awyen iγsan n Ccix Aḥeddad γer taddart-is u ad yesteεfu deg-s, akk-n d-iweṣ̣ṣ̣a.
 
Sγur Omar Mouffok
Tiγbula : iγmisen La Dépêche de Kabylie, El Watan.
 
Aru-d ay-n tettwaliḍ, ttekki deg wenmager-nneγ (forum).
 

Tiddukla Tadelsant Imedyazen
Association culturelle Imedyazen
BP 129 Poste Didouche Mourad
16006- Alger - Algérie
Tel. (+213) (0) 64 77 07 37