Make your own free website on Tripod.com

Tiddukla Tadelsant Imedyazen

Asebter n umager | Imagraden | Isalan | Imenzayen | Taftilt | Imawalen | Idlisen-nnegh | Leqdicat-nnegh | Imazighen | Lmed tamazight | English | Español | Français | Arabe | Anmager | Tabrat n Yimedyazen | Arum-agh-d | Imaslad'en | Tamesgida | Amezruy n Tiddukla

 

Iselmaden n tmaziγt la tteḥdiqiren seg wuguren

Tamazight

 

La Dépêche de Kabylie – Ljemεa, 21 Ctembeṛ 2007

 

Tnac n yiseggasen ay-a seg wasmi ay tekcem tmaziγt γer uγerbaz (llakul) adzayri, yerna ur tessaweḍ ara ad taf amkan-is deg-s alama ay εeddan acḥal n yiseggasen n yimenγi ay deg ttekkan acḥal n lejyal. Maca γas akk-a ass-a la tettusselmad tmaziγt deg uγerbaz, asselmed-ines mazal-it urzen-t kra n medden yesεan nneyya n diri.

 

Tagnit iweεṛen ay deg tteddren yiselmaden n yiles-a tesskanay-d uguren ay d-tettemlili tmaziγt akk-n ad tennerni. Seg tama, γas ma yella aγlif n welmud (ministère de l'éducation) la d-yessuffuγ leqwanen ara yessifessen asselmed n tmaziγt, kra n yemḍebbren la ttagin ad ddun s leqwanen-a u la as-sseεraqen tikli i usselmed n tmaziγt. Yerna, mi ara nwali ar ass-a mazal xuṣ̣ṣ̣en yiselmaden yemmuzzgen (spécialisés) akk-n ad sseγren tamaziγt, ad nẓer belli imḍebbren ur bγin ara s tidet ad ṣ̣errfen anect yessefken γef tmaziγt akk-n ad tt-snernin.

 

Seg tama niḍen, tamsalt n ussekcem n yiselmaden imaynuten (ijdiden) d yiwen kan yidis ay d-yelhan id-s. Deg yiseggasen imezwura ay deg tebda tmaziγt la tettusselmad deg uγerbaz (llakul), llan la d-ssekcamen iselmaden s uεemmuṛ, ma ass-a, tamsalt-a llan kra la ttkukrun ad d-ssiwlen fell-as. Yuγ lḥal, llan yiselmaden igan agatu (contrat) ay deg ara slemden tamaziγt tlata yiseggasen, u asmi ay ifuk ugatu-nni, ufan-d iman-nsen mazal ur sεin ara aẓayer (statut). D ay-a ay yejjan iselmaden-a, yal aseggas, ad ttmenṭaren deg yegniren (couloirs) n yiγerbazen amar ad d-afen win ara ten-iεawnen ad frun ugur-nsen.

 

Seg yidis n tesnalmudt (didactique), asselmed n tmaziγt mazal-it d igellil, dγa d ay-a ara aγ-yejjen ad nesseqsi iman-nneγ ma yella llan kra ay yebγan ad sxeṣ̣ren asselmed-ines neγ ahat, tamaziγt d iles ay ugin wid yeṭṭfen aγerbaz (llakul) adzayri ? 

 

Deg tesdawit Tubiret, naqal ad yettwaldi ugezdu (département) i yiles d tγerma tamaziγt, maca wid yettḍebbiren deg tesdawit n temdint-a ugin u ufan-d ssebba belli ur zmiren ara ad ldin agezdu n tmaziγt dinna imi ulac tidumṣ̣ukin (infrastructures) ay deg ara tettusselmed tmaziγt γer-sen. Yiwen n yemḍebber niḍen yenkeṛ ay-a u yenna-d belli d iselmaden ay ixuṣ̣ṣ̣en. Maca sdeffir n lekdeb-agi amessas, mazal yeffer wenkaṛ-nni ay inekkeṛ udabu iles amaziγ, d ankaṛ ay d-yettwaweṛten seg yiseggasen-nni n zik, anda ay tettwaḥqer tmaziγt.

 

Ugur niḍen ay yerẓan asselmed n tmaziγt netta d lxetyar yettunefken i twilayin akk-n ad slemdent iles amaziγ akk d wacḥal n yiselmaden ara teqbel yal tawilayt d wacu n uẓayer (statut) ara sεun yiselmaden-a. Imi yal tawilayt d tilellit akk-n ad textir ma ad tesselmed tamaziγt neγ ala, drusit twilayin ay iqeblen ad slemdent tamaziγt.

 

Nnig temsalt-a n lxetyar, yella daγen wugur yeqqnen γer yiles s timmad-is, u d win n ussizeγ-ines (standardisation). Ta d tamsalt ay iceγben imesnilsiyen (linguistes). 

 

Γef leḥsab n yimuzzag (spécialistes) ay d-yelhan s tmaziγt, iles-a yeḥwaj takadimit akk d tsudut (institution) ara d-yelhun s usselmed-ines. Lmeεna-ines, yessefk ad d-nessiwel i yemnuda yesεan aduktuṛa u d nitni ara d-yessumren (proposer) ilugan (règles) iwatan i tseddast (syntaxe) akk d tira n tmaziγt, u ad iεeddi yiles-a seg tegnit n yiles atlay (oral) γer tin n yiles yettwarun.

 

Tamsalt n wacu n tira ara nesseqdec akk-n ad naru tamaziγt d askasi (débat) niḍen ay γef ur msefhamen ara wid yebγan asekkil (lḥeṛf) alatini akk d wid yebγan asekkil aεṛab yerna aṭas n yemnuda ara yettwalin tamsalt-a n lxetyar n tira n tmaziγt teqqen γer tsertit (politique).

 

Mohamed Mouloudj

http://www.kabyle.com/Les-enseignants-de-tamazight,12512.html

 
Ẓer daγen :
 
 
 
 
 
 

Tiddukla Tadelsant Imedyazen
Association culturelle Imedyazen
BP 129 Poste Didouche Mourad
16006- Alger - Algérie
Tel. 064 77 07 37