Make your own free website on Tripod.com

Tiddukla Tadelsant Imedyazen

Asebter n umager | Imagraden | Isalan | Imenzayen | Taftilt | Imawalen | Idlisen-nnegh | Leqdicat-nnegh | Imazighen | Lmed tamazight | English | Español | Français | Arabe | Anmager | Tabrat n Yimedyazen | Arum-agh-d | Imaslad'en | Tamesgida | Amezruy n Tiddukla

 
"Tiregwa n Nnfiḍ" : Ammud* n yisefra n Djamila n Tferka
Tiregwa
 
 
”Aṭṭuqqet n lxir ur yettḍurru”. Akk-a ay as-yeqqar yiwen n wanzi inefεen deg wakk inurar n tudert, ladγa deg wenrar n tmaziγt, imi s kra n wedlis ara d-yeffγen s yiles-a, nesteṛḥib yes-s imi ara yejj tamaziγt ad taf amkan-is u ad tejhed.
 
Ussan-a, yeffeγ-d wedlis n yisefra n Djamila n Tferka, tamedyazt-nni yettwassnen deg tesgilt (nnuba) n « Tamedyazt war tilas », ay d-yettqeddim Mohamed Taferka deg BRTV.
 
”Tiregwa n Nnfiḍ”, ammud (recueil) n Djamila, d Mohamed Taferka s timmad-is ay as-d-yuran timsegrit (post-face) ay deg nezmer ad nγer « Ttawil inefεen akk ay tesseqdac tmeṭṭut taqbaylit akk-n ad d-tessiwel γef ddunit d yiγeblan-ines netta d isefra ». Djamila n Tferka tessen amek ara d-tecnu kullec s usefru, u tid yettgen am nettat, tikkwal yettwakkes-asent wawal.
 
Adlis n Djamila yesεa 180 n yisebtar yernu ulac deg-s tisuqilin (asṭerjem) γer tefṛensist (akk-n nennum nettaf deg kra n wammuden n yisefra niḍen). Taqcict-a tlul-d deg taddart n Ayt Yemγur, deg tγiwant n Amecṛas (Tizi Wezzu). Deg wammud-ines, tefka Djamila amur ameqran i tayri akk-n ad d-tessken i medden dakk-n γas ma yella nesmeεreq nettu-tt, tayri dima tetteqqel-d, dima nesmektay-itt-id. Dγa, Djamila tcennu γef wakk idisan n tayri, ula γef uḥemmel n tayri u mi ara nγer isefra-ines, ur nettḥulfu i trutint, wala i uεiwed. Isefra n Djamila ccuṛen d tamitafuṛt akk d tugniwin (images) n tmedyazt (poésie).
 
Deg usefru-ines ”Mi iḍaq ṛṛuḥ”, teqqar-d :
 
Aman leḥḥun deg lqaεa
Mi iḍaq seg-i
Ccwal selleγ-as yettεeyyiḍ
Taṛwiḥt ihennan, temḥa
 
Tettkemmil :
 
Ur zmirent tejmilin
Lxir-ik ad ak-t-rrent
Neγ aḥriq n tjejjigin
Yal ass ma hdiγ-ak-tent
Ad yettwalas wul ddin
 
Tamuγli-a tumliḥt ay tesεa Djamila teddukkel d tmussni-ines ijehden deg teqbaylit. D ay-a ay d-yettafken isefra ẓiden i tγuri.
 
Nnig temsalt n tayri, Djamila Taferka tessawal daγen γef tmedyazt (poésie) s timmad-is, γef tegnit n tmeṭṭut, γef waḍḍan, γef tmetti (société), γef lḥif, γef tudert, γef talwit d waṭas n tlufa niḍen …
 
Deg way-n yerzan tamṣ̣ukt (structure), Djamila tebna isefra-ines s yiberdan yemgerraden. Kra deg-sen d iskendriyen (alexandrins), maca tebna-d daγen ifyar (vers) s 8 n tunṭiqin (octosyllabe), akk d yisefra itteddun s ṛebεa yefyar neγ s ttesεa yefyar. Tameγrut (rime) n Djamila d tin ay deg teṭṭuqqet temṣ̣ukt n AAB, u tesseqdec tameγrut tanmidegt (rime croisée).
 
Yessefk ad d-nger tamawt dakk-n Djamila tesseqdec aṭas tamitafuṛt deg yisefra-ines, u llan kra deg-nsen, deg wezwel-nsen (titre) yagi ad tt-naf am “Ajejjig n Lekdeb”, “Tabrat i zzheṛ”, “Snulfu-iyi-d”.
 
Ammud-a (recueil) tessuffeγ-it-id Djamila i ddemma-ines, d acu kan , tettekka deg-s BRTV. D tiẓrigin ”Le Savoir” [Tizi Wezzu] ay t-id-yessuffγen. Axxam-a n ussuffeγ  n yedlisen, melmi kan ay d-yebda leqdic u la yettnerni cwiṭ, cwiṭ.
 
Djamila n Tferka, tesεa daγen zzheṛ imi argaz-ines, Salem Saâd, yebded s idis-is, yettεawan-itt. Tanaẓurt-a (artiste) la tt-yettṛaju waṭas n lxir γer sdat. Ihi a Djamila, γas faṛes !
 
Sγur Salem Amrane
 
Dépêche de Kabylie, Yebrir 2007
 
Tasuqilt sγur Omar MOUFFOK
 
 
 
 
 

Tiddukla Tadelsant Imedyazen
Association culturelle Imedyazen
BP 129 Poste Didouche Mourad
16006- Alger - Algérie
Tel. 064 77 07 37